रुख

यो रुख अब बुढो भैसक्यो
आफन्तवादको एसिड रेनले यसका पातहरू खुइलिएपछि
हरिया रहेका केही पातका स्टोमाटा
भ्रष्टाचारको प्रदूषणले बुजिएपछि
अब त
फोटो सिन्थेसिसद्वारा प्रगतिशील ग्लुकोज बन्न ठप्पै भैसक्यो
यो बुढो रुखले गर्दा
कतै राष्ट्रियताको इकोसिस्टम नै
असन्तुलनमा त पर्दै छैन ?
लौ
यो जीर्ण प्रतिगामी रुखलाई
एक युग पर्खेर
आफैँ ढलोस् भन्नु भन्दा
आऊ सबै मिलेर ढालौं
ताकि यसले
प्रजातन्त्र र समाजवादको ताजा अक्सिजन उत्सर्जन गर्दै
असमानताको विषाक्त कार्बनडाइअक्साइडलाई अवशोषण गरेर
जलवायु परिवर्तनजस्तै
परिवर्तनशील भूराजनीतिको जोखिमबाट
हाम्रो सार्वभौमसत्तालाई
सुरक्षित राखिराख्न सकोस्
यो ठूलो रुख हैन, असल रुख बन्न सकोस्। -sahityapost

Advertisement