तिलोत्तमा नगरपालिकाको प्रमुखमा खाँण र उपप्रमुखमा चौधरी विजयी

भैरहवा –  रुपन्देहीको तिलोत्तमा नगरपालिकाको प्रमुख (मेयर)मा नेपाली कांग्रेसका रामकृष्ण खाँण निर्वाचित भएका छन् । नेकपा एमालेका मोहन चापागाईंलाई ७६५ मतान्तरले पराजित गर्दै खाँण निर्वाचित भएका हुन् ।

निर्वाचन अधिकृतको कार्यालयका अनुसार खाँणले २४ हजार ३९६ मत प्राप्त गरी नगर प्रमुखमा विजयी भएका हुन् । खाँणका निकटतम प्रतिस्पर्धी एमालेका चापागाईंले २३ हजार ६३१ मत प्राप्त गरे । खाँण गृहमन्त्री तथा नेपाली कांग्रेसका केन्द्रीय सदस्य बालकृष्ण खाँणका सहोदर भाइ हुन् ।

Advertisement

खाँण गत मंसिरमा सम्पन्न कांग्रेसको १४ औं महाधिवेशनबाट कांग्रेस रुपन्देहीको जिल्ला सभापतिमा निर्विरोध निर्वाचित भएका थिए । त्यस्तै, उपप्रमुख (उपमेयर)मा भने फराकिलो मतान्तरसहित नेकपा एमालेकी जागेश्वरीदेवी चौधरी विजयी भएकी छन् ।

चौधरीले २३ हजार ८६ मत प्राप्त गरी उपप्रमुखमा निर्वाचित भएकी हुन् । उनका निकटतम प्रतिद्वन्द्वी गठबन्धनको तर्फबाट माओवादी केन्द्रका हेमलाल पाण्डेले ११ हजार ५४६ मत प्राप्त गरेका छन् । २०७४ को स्थानीय तह निर्वाचनमा तिलोत्तमा नगरपालिकाको मेयर र उपमेयर दुवै एमाले विजयी भएको थियो । चौधरी  २०७४ मा पनि उपप्रमुखमा निर्वाचित भएकी थिइन् । कुल १७ वटा वडा रहेको तिलोत्तमा नगरपालिकामा ९ वटा वडाको अध्यक्षमा कांग्रेस र ८ वडाको अध्यक्षमा एमालेले जित हासिल गरेको छ ।

तिलोत्तमा नगरपालिकामा वडा नं १, ४, ७, ८, १०, ११, १२ र १५ मा नेकपा एमालेले विजय हासिल गरेको छ भने वडा नं २, ३, ५, ६, ९, १३, १४ १६ र १७ मा नेपाली कांग्रेसले जित हासिल गरेको छ । यससँगै रुपन्देहीका १६ वटै स्थानीय तहमा मतगणना सकिएको छ । जसमध्ये १० वटा स्थानीय तहको प्रमुख काँग्रेसले जितेको छ भने ३ वटामा एमालेले जितेको छ । तीन वटा स्थानीय तहमा जनता समाजवादी पार्टी, लोकतान्त्रिक समाजावादी पार्टी र जनता प्रगतिशील पार्टीले एक/एक स्थानीय तहको प्रमुख जितेका छन् । माओवादी र नेकपा एकीकृत समाजवादी भने शून्य भएका छन् ।