March 29, 2024, Friday
१६ चैत्र २०८०, शुक्रबार

‘ढुलमुले’ सांसद खत्री

भैरहवा– सुखदुःखमा साथ दिएको जनाउँदै गत वैशाखमा माओवादी केन्द्र रोजेकी प्रदेशसभा सांसद विमला कुमारी खत्री वलीले सोमबार एमालेमा फर्किएको जनाएकी छन् । एक सातासम्म सम्पर्कबिहीन भएकी वलीले सोमबार एमाले रोजेको विज्ञप्ती मार्फत जनाइन् ।

Advertisement

विपक्षी गठबन्धनले सोमबार प्रदेश प्रमुख समक्ष पेश गरेको समावेदनमा पनि वलीको हस्ताक्षर उल्लेख छ । यसबाट उनको ढुलमुले प्रवृत्ति प्रष्ट भएको छ । सुरुमा उनले नेकपा फुट्दा एमाले रोजेकी थिइन् । गत बैशाखमा उनले माओवादी केन्द्र रोजिन् । पत्रकार सम्मेलन गर्दै माओवादीमै रहने बताएकी थिइन् । तीन महिनापछि पुनः आफू एमाले रहेको भन्दै विज्ञप्ती जारी गरेकी छिन् ।

Advertisement

माओवादी रोज्दा ठूलो आर्थिक लाभ लिएको उनीमाथि आरोप थियो । अहिले मुख्यमन्त्री शंकर पोखरेल अल्मतमा परिसकेको अवस्थामा उनले एमाले रोजेर घाउमा थोरै भए पनि मल्हम् लगाएकी छिन् । एमाले रोज्दा पनि उनले आर्थिक लाभ लिएको आरोप लाग्न सुरु भएको छ ।

सरकार अल्पमतमा परेपछि एमालेले लामो समयदेखि सांसद पार्टीमा फर्काउने प्रयास गर्दै आएको थियो । यसै क्रममा वलीलाई फकाउन सफल भएको हो । दुईसाता अघि जनता समाजबादीकी सांसद पुर्मती ढेंगा मगर पनि सम्पर्कबिहीन भएकी थिइन् । उनलाई एमालेले पार्टीमा ल्याउन खोजेको हल्ला चलेको थियो । उनी पार्टीको सम्पर्कमा आएपछि वली हराएकी थिइन् । तानातानमा परेकी वली अन्ततः एमाले फर्केकी हुन् ।

सांसद विमलाका श्रीमान् उत्तरकुमार ओली भने २०७४ सालमा एमालेबाट निर्वाचित भएका थिए । उनको सवारी दुर्घटनामा मृत्यु भएपछि उप–निर्वाचनमा तत्कालीन नेकपाबाट विमला प्रदेशसभा सदस्यमा निर्वाचित भएकी थिइन् । उपनिर्वाचनमा आफूले माओवादी नेताहरूबाट नै बढी समर्थन र सहयोग पाएकाले सोही पार्टीमा लाग्ने निर्णय आफूले गरेको विमलाको भनाइ थियो । वली दाङ प्रतिनिधिसभा निर्वाचन क्षेत्र ३ को प्रदेश सभा निर्वाचन क्षेत्र (ख) बाट निर्वाचित भएकी थिइन् ।