शहीदहरूले देखेका सपना साकार पार्न लागेका छौंः मुख्यमन्त्री आचार्य

Advertisement

दाङ– लुम्बिनी प्रदेशका मुख्यमन्त्री चेतनारायण आचार्यले शहीदहरूको बलिदानबाट प्राप्त नागरिक स्वतन्त्रता, संघीय लोकतान्त्रिक गणतन्त्र र संवैधानिक उपलब्धिलाई कमजोर हुन नदिन सबै पक्ष सजग र जिम्मेवार हुनुपर्ने बताएका छन् ।

Advertisement

शहीद दिवस, २०८२ को अवसरमा शुक्रबार जारी सन्देशमा मुख्यमन्त्री आचार्यले संविधान कार्यान्वयन, राजनीतिक स्थायित्व, सुशासन र आर्थिक समृद्धिका क्षेत्रमा चुनौतीहरू कायमै रहेकाले लोकतान्त्रिक मूल्य–मान्यताको संरक्षण र नागरिक अधिकारको सुनिश्चितता आजको साझा दायित्व भएको उल्लेख गरेका हुन् ।

उनले नागरिक स्वतन्त्रता, राष्ट्रिय स्वाधीनता, संविधानको रक्षा, संघीय लोकतान्त्रिक गणतन्त्र स्थापनाका लागि आफ्नो अमूल्य जीवन उत्सर्ग गर्ने सम्पूर्ण महान् शहीदहरूप्रति भावपूर्ण श्रद्धाञ्जली अर्पण गरेका छन् । शहीद दिवस देश र जनताको हितका लागि प्राण आहुति दिने वीर शहीदहरूको संघर्ष, त्याग र बलिदानको स्मरण गर्ने ऐतिहासिक दिन भएको उनको भनाइ छ ।

मुख्यमन्त्री आचार्यले नेपाली जनतालाई सार्वभौमसत्ता सम्पन्न नागरिकका रूपमा स्थापित गर्दै स्वाधीन, समावेशी र न्यायपूर्ण राज्य निर्माणका लागि शहीदहरूले गरेको बलिदानको सम्मानस्वरूप हरेक वर्ष माघ १६ गते शहीद दिवस मनाइँदै आएको स्मरण गराएका छन् ।

शहीदहरूले देखेका सपना साकार पार्न तीनै तहका सरकार, राजनीतिक दल, नागरिक समाज र आम नागरिकले साझा जिम्मेवारी निर्वाह गरिरहेको उल्लेख गर्दै उनले आज प्राप्त भएका सबै राजनीतिक, सामाजिक र संवैधानिक उपलब्धिहरू शहीदहरूको संघर्षकै परिणाम भएको बताएका हुन् ।

मुख्यमन्त्री आचार्यले लुम्बिनी प्रदेश सरकार महान् शहीदहरूको त्याग, समर्पण र बलिदानको उच्च सम्मान गर्दै संविधानको प्रभावकारी कार्यान्वयन, सुशासन र समृद्ध प्रदेश निर्माणमा दृढतापूर्वक प्रतिबद्ध रहेको स्पष्ट पारेका छन् । शहीदहरूको बलिदानबाट स्थापित संघीय लोकतान्त्रिक गणतन्त्रात्मक शासन व्यवस्थामार्फत् दिगो शान्ति, सामाजिक न्याय, विकास र समृद्धिको आकांक्षा पूरा गर्न अग्रसर हुनु नै शहीदप्रतिको सच्चा श्रद्धाञ्जली हुने उनको विश्वास छ ।