चुनाव लड्न लुम्बिनीका तीनजना सांसदले दिए पदबाट राजीनामा

पब्लिक कुरा
२०८२ माघ ५

789 Share

भैरहवा– प्रतिनिधिसभा निर्वाचन लड्नका लागि लुम्बिनी प्रदेश सभाका तीन जना सांसदले पदबाट राजीनामा दिएका छन् ।

प्रदेश सभा सचिवालयका अनुसार नेपाली कम्युनिस्ट पार्टी (नेकपा)का धनबहादुर मास्की र नेकपामा समाहित भएको नागरिक उन्मुक्ति पार्टी (नाउपा)का सांसद धर्मबहादुर चौधरीले प्रदेश सभा सदस्यबाट राजीनामा दिएका हुन् । यस्तै, रुपन्देही क्षेत्र नम्बर ४ (१) मा तत्कालिन लोकतान्त्रिक समाजवादी पार्टी (लोसपा), नेपालबाट प्रदेश सभा सदस्यमा निर्वाचित कन्हैया बनियाले राजीनामा दिएका छन् ।

लुम्बिनी प्रदेश सभाका सचिव दुर्लभकुमार पुनले दुईजना प्रदेश सभा सदस्यले आइतबार र एकजनाले सोमबार पदबाट राजीनामा दिएको बताए । चौधरी यसअघि नाउपाबाट बर्दिया २ (२)बाट निर्वाचित भएका थिए । तर नाउपा प्रचण्ड नेतृत्वको नेकपामा समाहित भएपछि उनी भने कुलमान घिसिङ नेतृत्वको उज्यालो नेपाल पार्टीमा लागेका थिए । उनी उज्यालो नेपाल पार्टीका महासचिवसमेत हुन् ।

मास्की दाङ निर्वाचन क्षेत्र नं. ३ बाट र चौधरी बर्दिया–२ बाट उम्मेदवार बन्न लागेका छन् । बानियाँ रास्वपाबाट रुपन्देही क्षेत्र नम्बर ४ मा उम्मेदवार बनेका छन् ।

मास्की यसअघि तत्कालीन नेकपा माओवादी, एकीकृत समाजवादी र कांग्रेससहितको गठबन्धनबाट २०७९ को निर्वाचनमा दाङ ३ (२) बाट एमालेका हुकुमबहादुर बस्नेतलाई पराजित गरेका थिए । उनी लुम्बिनी प्रदेशको आर्थिक मामिला तथा योजना मन्त्री बनेका थिए ।

चौधरीले यसअघि माओवादी–कांग्रेस गठबन्धनबाट उम्मेदवार बनेका माओवादी केन्द्रका मानबहादुर थारुलाई हराउँदै विजयी भएका थिए । उनी प्रदेश सभामा नउपाबाट भौतिक पूर्वाधार मन्त्रीसमेत बनेका थिए ।