दाङ पुगेर शंकर पोखरेलले भने- संसद पुनर्स्थापना नै सुरक्षित बाटो हो

Advertisement

दाङ– नेकपा एमालेका महासचिव शंकर पोखरेलले चुनाव हुने स्थिति बने एमाले सहभागी हुने बताएका छन् । तर, अहिले देशमा चुनाव हुने वा नहुने भन्ने अनिश्चितता कायम रहेको अवस्थामा प्रतिनिधिसभाको पुनःस्थापना नै स्पष्ट र सुरक्षित बाटो भएको बताए ।

Advertisement

प्रेस चौतारी दाङले बिहीबार घोराहीमा आयोजना गरेको पत्रकार भेटघाट तथा बधाई ज्ञापन कार्यक्रममा बोल्दै पोखरेलले भने, ‘एमाले चुनावप्रति अडिग छ । तर, अहिले मुलुकको अवस्था सही ढंगले अगाडि बढेको छैन । त्यसैले यो अवस्थामा संसद पुनःस्थापना सबैभन्दा राम्रो विकल्प हो ।’

अराजकता र लोकप्रियतावादले लोकतन्त्र कमजोर हुने भएकाले सचेत हुन आह्वान उनले गरे । यस्तै दलहरू फुट्नु भन्दा जुट्नु लोकतन्त्रका लागि फाइदाजनक हुने उनले बताए । कांग्रेसभित्र देखिएको विवादले लोकतन्त्रमा गम्भीर असर पर्न सक्ने टिप्पणी गर्दै उनले रवि लामिछानेको मुद्दा फिर्ता लिनेजस्ता गतिविधिले सरकार कहाँबाट सञ्चालित छ भन्ने प्रश्न उठाएको धारणा राखे । यस्ता गतिविधिले निर्वाचनको वातावरण कमजोर बनाउने उनको भनाइ छ ।

समाजमा अहिले पनि शान्ति र सुरक्षाको प्रत्याभूति नहुनु चिन्ताजनक रहेको उल्लेख गर्दै पोखरेलले लुटिएको हतियार संकलन, भगाइएका कैदी फिर्ता ल्याउने, प्रहरीको मनोबल वृद्धि गर्ने काममा सरकार तल्लिन हुनुपर्ने सुझाव दिए ।

कार्यक्रममा महासचिव पोखरेल, मुख्यमन्त्री तथा एमाले केन्द्रीय सदस्य चेतनारायण आचार्य, केन्द्रीय सदस्य तथा घोराही उपमहानगरपालिकाका प्रमुख नरुलाल चौधरी, केन्द्रीय सदस्य सुजिता शाक्य, मेनका पोखरेल, घनश्याम पाण्डे, कोमल वली, केन्द्रीय लेखा आयोग सदस्य रेवतीरमण शर्मा लगायतलाई चौतारी दाङले सम्मान गरेको थियो ।