न्यूनतम सेवा मापदण्ड मूल्यांकनमा भीम अस्पताल लुम्बिनी प्रदेशमा दोस्रो

Advertisement

भैरहवा– रुपन्देही सदरमुकाम भैरहवास्थित भीम अस्पताल न्यूनतम सेवा मापदण्ड (एमएसएस) कार्यान्वयन मूल्यांकनमा लुम्बिनी प्रदेशमा दोस्रो हुन सफल भएको छ । सरकारले लागू गरेको न्यूनतम सेवा मापदण्ड कार्यान्वयन कार्यक्रममा बर्दिया जिल्ला अस्पतालले ९६ अंक प्राप्त गरेर पहिलो भएको छ । जिल्ला अस्पताल समेत रहेको भीमले ९५ अंक प्राप्त गरी दोस्रो भएको हो ।

Advertisement

मंगलबार भैरहवास्थित अस्पताल परिसरमा आयोजित कार्यक्रममा मूल्यांकन तथा अनुगमन समितिले तथ्यांक सार्वजनिक गर्दै भीम प्रदेशमा दोस्रो भएको जानकारी दिइएको हो । अस्पतालले प्रदान गर्नुपर्ने न्यूनतम सेवाको अवस्था, पारदर्शिता, फोहोर व्यवस्थापन, फार्मेसीबाट हुने सेवा प्रवाह लगायत दर्जन मापदण्ड राखेर अनुगमन समितिले मूल्यांकन गरेको थियो ।

यस्तै, अस्पतालको प्रशासन, व्यवस्थापन, बजेट खर्चको अवस्था, विशेषज्ञ सेवा, निःशुल्क उपचार सेवा लगायतका सूचकलाई पनि आधार मानेर मूल्यांकन गरिएको अनुगमन समितिले जनाएको छ । अस्पताल अनुगमन, मूल्यांकन तथा समीक्षा कार्यक्रममा भीम अस्पतालको सेवा प्रवाह प्रभावकारी रहेकाले उच्च अंक प्राप्त गरेको एमएसएसको निष्कर्ष छ । सार्वजनिक गरेको तथ्यांकअनुसार लुम्बिनी प्रदेशका ‘ए’ लेबलका अस्पतालमध्ये गुल्मी अस्पतालले ९१ अंक प्राप्त गर्दै तेस्रो स्थानमा भएको छ भने भालुवाङ अस्पताल ४७ अंकसहित पुछारमा छ ।

कार्यक्रममा बोल्दै कपिलवस्तु अस्पतालका प्रमुख तथा अनुगमन समितिका फोकल पर्सन डा. किशोर बन्जाडेले अस्पताललाई दिगो बनाउने हो भने भौतिक पूर्वाधार र उपचार व्यवस्थापनमा विशेष ध्यान दिनुपर्नेमा जोड दिए । जाडो मौसममा बिरामीको चाप देखिएको उल्लेख गर्दै उनले चैत महिनामा अझ बढ्ने भएकाले अस्पताललाई कम्तिमा सय शय्यामा विस्तार गर्न सुझाए । उनले अस्पतालको सेवा प्रवाह प्रभावकारी रहेको जनाए ।

भीम अस्पतालकी मेडिकल सुपरिटेन्डेन्ट डा.वर्षा थापाले जनशक्तिको अभाव हुँदाहुँदै पनि सेवा सुधारमा निरन्तर लागिरहेको बताइन् । अंक बढाउनु मात्र नभएर सेवालाई गुणस्तर बनाउँदै सुधार गर्नु महत्वपूर्ण रहेको उनको भनाई छ । उनले बिरामीलाई सहज र भरपर्दो उपचार दिने अस्पतालको लक्ष्य रहेको बताइन् । सिद्धार्थनगर नगरपालिकाका प्रमुख इश्तियाक अहमद खाँले महिला वार्ड तथा प्रसूति गृह सफा हुनुपर्नेमा जोड दिँदै अस्पताल परिसरभित्र इको–फ्रेन्डली बगैँचा निर्माण गर्नुपर्नेको जोड दिए । उनले मूल्यांकनमा जसरी सेवा प्रवाह पनि वास्तविक रुपमा अग्रणी हुनुपर्नेमा बताए ।

भीम अस्पतालको एमएसएस मूल्यांकनले पछिल्ला वर्षहरुमा सेवा प्रवाह उल्लेखनीय सुधार हुँदै आएको देखिन्छ । अस्पतालले ओपिडी, दन्त सेवा, आपतकालीन सेवा, फार्मेसी लगायतका क्लिनिकल सेवालाई गुणस्तरीय बनाउँदै लगेकाले अंक वृद्धि भएको एमएसएसको भनाई छ । यद्यपि अझ सुधार गर्नुपर्ने एमएसएसले सुझावसमेत दिएको छ । सबै विभागमा बढ्दो भीड व्यवस्थापन, फार्मेसी विस्तार तथा पोस्टमार्टमका लागि नयाँ भवन निर्माण गर्न समितिको सुझाव छ ।