भैरहवामा आर्मी क्लब र रूपन्देहीको टीमबीच ८ खेलमा स्पर्धा हुँदै, रूपन्देहीका खेलाडी बन्द प्रशिक्षणमा

पब्लिक कुरा
२०८२ पुष १८

731 Share

भैरहवा– रुपन्देही क्रिकेट संघको आयोजनामा पुस २० देखि भैरहवामा हुने ‘पवनकुमार सेठिया स्मृति मैत्रीपूर्ण क्रिकेट प्रतियोगिता’का लागि रुपन्देही–११ टिमको बन्द प्रशिक्षण भइरहेको छ । भैरहवास्थित सिद्धार्थ क्रिकेट मैदानमा बिहीबारदेखि प्रशिक्षण भइरहेको हो । संघको आयोजनामा पहिलोपटक त्रिभुवन आर्मी क्लब ‘ए’ टीम र रुपन्देहीका खेलाडीहरुको रुपन्देही–११ टीम बनाएर स्पर्धा गराउन लागिएको हो । प्रशिक्षण शनिबारसम्म चल्ने छ ।

खेलाडीहरुलाई रुपन्देही क्रिकेट संघका प्रमुख प्रशिक्षक बसन्त शाही ठकुरी र सहायक प्रशिक्षक शंकर रानाले प्रशिक्षण दिइरहेका छन् । संघका अनुसार ३६ जना खेलाडीहरुलाई बन्द प्रशिक्षणमा राखिएको छ । छनोट समिति संयोजक धीरज अधिकारी क्षेत्रीका अनुसार बन्द प्रशिक्षणमा रहेका खेलाडीहरुबाट रुपन्देहीको टीम तयार पारिनेछ ।

हाल प्रशिक्षणमा एनपीएल, विगतमा राष्ट्रिय टीमबाट खेलिसकेका खेलाडी, क्लब र जिल्ला तथा प्रदेशस्तरमा यसअघि उत्कृष्ट प्रदर्शन गरेका खेलाडीहरुलाई राखिएको छ । प्रशिक्षणका क्रममा उत्कृष्ट प्रदर्शन गर्ने १४ जना खेलाडी छनोट गरी रुपन्देहीको टीम बनाइने छ ।

संघका अध्यक्ष हरिबहादुर थापाले खेलाडीहरुको खेल प्रतिभा, क्षमता र निरन्तरताका लागि प्रतियोगिता आयोजना गरिएको जनाए । उनका अनुसार जिल्लास्तरमा यसअघि यस किसिमका प्रतियोगिता भएका छैनन् । प्रतियोगितामार्फत भविष्यमा रुपन्देही क्रिकेटको ‘बेन्च स्ट्रेन्थ’ तयार पार्न मद्दत मिल्ने थापाले बताए ।

आयोजकका अनुसार प्रतियोगिता अवधीभर ५० ओभरका एकदिवसीय तीनवटा, ९० ओभरका दुईवटा र टी–२० तीन गरी ८ वटा खेल हुनेछन् । प्रतियोगिता संयोजक प्रथम पराजुलीले भैरहवाका व्यवसायी हरिश सेठियाले आफ्ना बुवा स्वर्गीय पवन कुमार सेठियाको स्मृतिमा यो प्रतियोगिताको मुख्य प्रायोजन गरेको जानकारी दिए । प्रतियोगिताका प्राविधिक संयोजन गरिरहेका संघका सदस्य विजयसिंह ज्ञवालीले व्यवस्थापकी कामको तयारी सकिएको जनाए ।