न्युज फेस्टिवल सफल पार्न सहयोग गर्ने भारतीय पत्रकारहरूको प्रतिबद्धता

पब्लिक कुरा
२०८२ पुष ७

683 Share

सुनौली– भारतीय संचारकर्मीहरुले पुस दोस्रो साता बुद्ध जन्मस्थल लुम्बिनीमा आयोजना हुन लागेको तेस्रो लुम्बिनी न्यूज फेस्टिवललाई भव्य बनाउन सहयोग गर्ने प्रतिबद्धता जनाएका छन् । सिमावर्ती क्षेत्रका समाचार सम्बन्धित मुद्दा र लुम्बिनीको पर्यटन प्रवद्र्धन गर्ने उद्देश्यले लुम्बिनी प्रेस क्लब, रुपन्देहीले पुस १२, १३ र १४ गते बुुद्ध जन्मस्थल लुम्बिनीमा फेस्टिवल गर्दै छ ।

सोमबार भारतको सुनौलीमा लुम्बिनी प्रेस क्लबले आयोजना गरेको पत्रकार सम्मेलनमा बोल्दै महारजगंज प्रेस क्लबका अध्यक्ष अमित त्रिपाठीले दुई देशको पत्रकारिताको अभ्यास, सीमा क्षेत्रका मुद्दा र पर्यटन प्रबद्र्धन गर्ने उद्देश्यले आयोजित फेस्टिवललाई भव्य तुल्याउन आफूहरुले सबै किसिमका सहयोग गर्ने जनाए । उनले दुई देशका पत्रकार, नेपालको निजी क्षेत्र र सरकारी निकायबीचको बहसले पक्कै पनि नेपाल–भारतको सम्बन्धलाई थप उचाईमा पुर्याउन सहयोग पुग्ने जनाए ।

पत्रकार आलोक जोशी र सुदेश त्रिपाठीले न्युज फेस्टिवलले दुबै देशको नयाँ अभ्यास र सीमा क्षेत्रको समस्या उजागर गर्ने विश्वास व्यक्त गरे । उनीहरुले भारतीय संचारकर्मीबाट हुने सबै किसिमका सहयोग गर्न तयार रहेको बताए । लुम्बिनी प्रेस क्लबका अध्यक्ष कमल रायमाझीले तेस्रोपटक हुुन गइरहेको समाचार महोत्सवलाई ऐतिहासिक र उपलब्धिपूर्ण बनाउन लागिपरेको जनाए ।

महोत्सवमा नेपाली पत्रकारिता र सञ्चारक्षेत्रका बारेमा छलफल, बहस, अन्तरक्रिया हुने उनको भनाई छ । उनका अनुसार यसले पत्रकारिताको असल अभ्यास र आगामी कार्यदिशा तय गर्ने छ । कार्यक्रम संयोजक एवं क्लबका उपाध्यक्ष दीपेन्द्र बडुवालले तेस्रो समाचार महोत्सवमा समाचारका विभिन्न विधाको बारेमा छलफल, बहस र अन्तरक्रिया गरिने र त्यसले नेपाली पत्रकारिताको इतिहासको समीक्षा गर्दै, वर्तमानको अवस्था उजागर गर्नुका साथै भविष्यको मार्ग तयार गर्न योगदान दिने अपेक्षा गरिएको बताए ।

तेस्रो समाचार महोत्सवमा भारतको महारजगंज, लखनउ, बनारस, अयोध्या, दिल्ली, गोरखपुर र सिक्किमका पत्रकार, काठमाडौंका पत्रकार तथा नेपालको विभिन्न जिल्लाबाट प्रतिनिधिमूलक रुपमा पत्रकारहरु सहभागी हुने हुनेछन् ।

यस्तै, फेस्टिवलमा लुम्बिनी सरकारका मुख्यमन्त्री, मन्त्रीहरु, प्रदेशसभा सदस्यहरु, पूर्वमन्त्री, स्थानीय तहका जनप्रतिनिधि, प्रेस काउन्सिल र नेपाल पत्रकार महासंघ केन्द्रीय समिति अध्यक्ष, मूलधारका सम्पादक, जिल्लास्थित महासंघका अध्यक्ष तथा पत्रकारहरु, पर्यटन व्यवसायी, निजी क्षेत्रका छाता संगठन, उद्योगी–व्यवसायी, कर्मचारी लगायतको सहभागिता रहनेछ । १२ वर्ष अगाडि क्रियाशील पत्रकारहरुको सक्रियतामा स्थापना भएको लुम्बिनी प्रेस क्लबले २०७६ र २०८० मा न्युज फेस्टिवल गरिसकेको छ ।