भैरहवाका उद्योगी–व्यवसायीको डेढ करोड ठगेर सम्पर्कबिहीन

Advertisement

भैरहवा– भैरहवाका उद्योगी–व्यवसायीबाट डेड करोडका खाद्यान्न समाग्री खरिद गरेर रकम भुक्तानी नगरेर एक व्यक्ति सम्पर्क बिहीन भएका छन् । जसले गर्दा उधारोमा सामान विक्री गरेका उद्योगी व्यवसायी मर्कामा परेका छन् । आफूलाई होलसेल व्यापारी बताएर सामान खरिद गरेका ती व्यक्ति दसैंको फूलपातीबाट सम्पर्क बिहीन बनेका हुन् । उनी गायव भएपछि उद्योगी–व्यवसायी आत्तिएका छन् ।

Advertisement

आफूलाई चितवनको व्यापारी बताउने दीपक खनालले समान खरिद गरेर केही दिनमा चेकमार्फत् भुक्तानी गर्ने जनाएर गायव बनेको व्यवसायीले बताए । चितवनको भरतपुर नगरपालिकास्थित रामनगरको एक घरमा सटर भाडामा लिएर बसेका ती व्यक्ति फूलपातीको दिन ट्रकमा सामान लोड गरेर फरार भएका थिए । उक्त घरमा १० महिनासम्म एउटा सटर भाडामा लिएर दाल, चामल, तेल लगायत खाद्यान्न व्यापार गरेका उनी अर्को ठाउँमा पनि पशल सञ्चालन गर्ने भन्दैं सामान लिएर गएको घर धनीले जनाइन् । अहिले उक्त घरको सटर खाली छ ।

भैरहवाका उद्योगी बृजेशकुमार अग्रवालका अनुसार खनालले चितवनको जुगेडीमा आफ्नो गोदाम रहेको जनाएका थिए । चितवनका खाद्यान्न व्यावसायीसित सामान खरिद गर्ने प्रयास असफल भएपछि खनाल भैरहवा आइपुगेका थिए । नारायणगढस्थित खाद्यान्न उद्यमी रञ्जन अग्रवालले आफू कहाँ पनि चामल लगायत खाद्यान्न खरिदका लागि खनाल पटकपटक आएको बताए । ‘रामनगरमा बसेर व्यवसाय गर्छु भनेपछि पत्यार लागेन,’ उनले भने, ‘चितवनका सबै खाद्यान्न व्यवसायी नारायणगढमा छन् । नयाँ अनुहारका व्यक्तिको कुरा गर्ने शैली पनि नक्कली लागेको थियो ।’

भैरहवाबाट खाद्यान्न खरिद गरेर ल्याएर काठमाडौं पुर्याएर कम मूल्यमा विक्री गरेको आशंका उनले गरे । उद्योगी बृज्रेशकुमार अग्रवालले आफ्ना दुईवटा उद्योगबाट खनालले २२ लाखको दाल र तेल लगेर भुक्तानी नदिएको जनाए । एकपटक लगेको सामानको भुक्तानी नगरेर अर्को ट्रक सामान माग गरेपछि शंका लागेर विक्री नगरेको उनले बताए । सामान लगेको लामो समयम्म भुक्तानी प्राप्त नगरेपछि उद्योगी अग्रवाल खनालको खोजी गर्दै बुधबार चितवन पुगेका थिए ।

खनालले आफ्नो म्यानेजर भनेर शिव गिरीको मोवाइल नम्बर दिएका थिए । अहिले खनाल र गिरी दुबैको मोवाइल स्वीच अफ गरिएको छ । दुबैजना चितवनबाट कहाँ गए भन्ने पत्तो छैन । अग्रवालले जिल्ला प्रशासन कार्यालय, चितवनमा ठगी रकम अशुलउपर गरिपाउँ भनेर बुधबारै निवदेन गर्दा गराएका छन् । निवेदन बुझेपछि चितवनका प्रमुख जिल्ला अधिकारी गणेश अर्यालले प्रहरी मार्फत् ठगीमा संलग्न व्यक्तिबारे अनुसन्धान गर्ने बताए ।

जसरी हुन्छ ती व्यक्तिलाई पत्ता लगाएर कारबाही गर्ने अर्यालले प्रतिवद्धता जनाए । उद्योगीका अनुसार खनालले भैरहवाका आधा दर्जन उद्योगी व्यवसायीबाट डेढ करोडको खाद्यान्न लगेर रकम भुक्तानी गरेका छैनन् ।