February 8, 2025, Saturday
२०८१ माघ २७

विश्वका घुम्नलायकको सूचीमा लुम्बिनी परेपछि पर्यटन क्षेत्रमा उत्साह

लुम्बिनी– बुद्ध जन्मस्थल लुम्बिनी विश्वविख्यात पत्रिका न्यूयोर्क टाइम्सले सार्वजनिक गरेको विश्वका घुम्नलायक उत्कृष्ट स्थानको सूचीमा परेपछि यस क्षेत्रीमा खुशी छाएको छ । खागरी पर्यटक व्यवसायी यसबाट खुशी छन् । सन् २०२५ मा घुम्न जानुपर्ने विश्वका उत्कृष्ट ठाउँमध्येको नवौं नम्बरमा लुम्बिनी छ  । ‘२०२५ मा पुग्नैपर्ने विश्वका ५२ उत्कृष्ट ठाउँ मध्ये लुम्बिनी नवौं स्थानमा पर्नु हाम्रो लागि सुखद् क्षण हो’, लुम्बिनी होटल संघ नेपालका अध्यक्ष गोविन्द ज्ञवालीले भने, ‘विश्वविख्यात पत्रिकाले लुम्बिनीलाई समेट्दा पक्कै पनि यहाँका पर्यटन प्रबद्र्धन हुन्छ । यससँगै पर्यटक आगमन पनि बढ्ने अपेक्षा छ ।’

Advertisement

‘प्राचीन तीर्थस्थलमा नयाँ मन्दिर र ध्यान केन्द्रको भ्रमण गर्नुहोस्’ भन्दै न्यूयोर्क टाइम्सले लुम्बिनीबारे संक्षिप्त परिचय समेत राखेको छ । त्यसमा लेखिएको छ– हजारौं वर्ष पहिले मायादेवी नामकी रानीले लुम्बिनीको बगैंचामा बुद्ध सिद्धार्थ गौतमलाई जन्म दिएकी थिइन् । त्यतिबेलाका पुरातन भग्नावशेष र समकालीन बौद्ध केन्द्रहरुले भरिएको तीर्थस्थल भएको छ लुम्बिनी । विनाशकारी भूकम्पले नेपाललाई हल्लाएको १० वर्षपछि नयाँ मन्दिर र ध्यान केन्द्रहरु खुलिरहेका छन् ।

लुम्बिनीलाई अब विशेष महत्व दिएर बजेट छुट्याइ गुरुयोजना पूरा गर्नमा समेत ध्यान दिनुपर्ने ज्ञवालीले बताए । ‘कोभिड पछि विस्तारै लुम्बिनीको पर्यटन सुधार हुँदै गएको छ’, उनले भने, ‘यसलाई अझ बढवा दिन विश्वकै घुम्न पर्ने नवौं स्थानमा लुम्बिनी पर्नुले थप टेवा पुग्छ ।’ उनले लुम्बिनीलाई अझै शान्त, मनोरम र शान्तिप्रेमीको थलो बनाउनुपर्नेमा जोड दिए ।

पत्रिकाले लुम्बिनीको संक्षिप्त परिचयमा गत नोभेम्बरमा खुलेको ‘थाउजेण्ड टेम्पल’बारे चर्चा गरेको छ । फोटो पनि सोही टेम्पलको भित्ताको पेन्टिङलाई राखिएको छ । ‘थाउजेण्ड टेम्पल’तीनतले तिब्बती शैलीको बिहार हो । यो बिहारभित्र १८ इन्च अग्ला हजार बुद्धका प्रतिमाहरु छन् । साथै त्रिकाल बुद्धका १६ फिट अग्ला तीन प्रतिमा पनि देख्न सकिन्छ ।

न्यूयोर्क टाइम्सले समेटेको विश्वका उत्कृष्ट गन्तव्यस्थलको सूचीको पहिलो नम्बरमा इंग्ल्याण्डको जेन अस्टिन, इक्वेडरको ग्यालापागोस द्वीप, न्यूयोर्क म्युजियम, भारतको आसाम, थाइल्याण्डको ह्वाइट लोटस लगायत छन् । सिद्धार्थ होटल संघ नेपालका अध्यक्ष चन्द्रप्रकाश श्रेष्ठले लुम्बिनीको अहिलेको चर्चा र स्थानलाई एक नम्बरमा पुर्याउने गरी काम गर्नुपर्नेमा जोड दिए । ‘हाम्रो नाकादेखि लुम्बिनीसम्मै पर्यटनमैत्री काम गर्नुपर्ने धेरै छन्’, उनले भने, ‘सबै ठाउँ पर्यटकले हेर्न लायक बनाउनुपर्छ । यसका लागि तीन तहका सरकारले काम गर्नुपर्छ ।’ श्रेष्ठले लुम्निबी विश्वकै घुम्नपर्ने नवौं स्थानमा पर्दा पर्यटन क्षेत्रमा खुशी र उल्लास छाएको बताए ।

‘यसबाट पर्यटन व्यवसायीसँगै सिंगो मुलुक खुशी छ । यो खुशीलाई हाम्रो लाभमा परिणम गर्नसक्नुपर्छ’, उनले भने, ‘यसका लागि लुम्बिनी विकास कोषसहितका निकायले वातावरण बनाउनुपर्छ ।’ उनले अब लुम्बिनी विश्वभरका धेरै मुलुकका अधिक पर्यटक आउने विश्वास गरिएको जनाए ।

लुम्बिनी विकास कोषका कोषाध्यक्ष ढुण्डिराज भट्टराईले लुम्बिनी गरिमा थप उचाईमा पुगेको सुनाए । ‘यसैमा लुम्बिनी विश्वकै उत्कृष्ट गन्तव्य हो’, उनले भने, ‘अब झनै गरिमा विश्वजगतमा थप उचाईमा पुगेको छ ।’ उनले विकास कोषले लुम्बिनीको विकास, पर्यटन प्रबद्र्धन र सुन्दरीकरणमा विशेष ध्यान दिएर काम गरिरहेको जनाए ।