टिप्परबाट तस्करीका सामान ढुवानी गर्ने नयाँ तरिका

भैरहवा– सामान्यतयाः ढुंगा, गिट्टी वालुवा, माटो जस्ता नदीजन्य सामानको ढुवानी गर्ने गरेका टिप्परले भन्सार छलिका सामानको ढुवानी गर्छन् भन्ने कुरा सोचिँदैन । आम मानिसको यही सोंचको फाइदा उठाउँदै तस्करले तस्करीका सामान ढुवानीमा टिप्परको प्रयोग गर्ने गरेको नयाँ कुराको खुलासा हुन पुगेको छ ।

भैरहवा हुँदै बुटवलतर्फ जाने क्रममा लु २ ख १२५३ नम्बरको टिप्परलाई भैरहवा भन्सार कार्यालयको टोलीले बेथरीमा नियन्त्रणमा लिएको पछि तस्करीको यो नयाँ तरिकाबारे रहस्य खुलेको हो । उक्त टिप्परबाट भन्सार टोलीले १५ लाख भन्दा धेरै मूल्यको भन्सार छलि गरेको कपडा र हुक्काको फ्लेबर बरामद गरेको छ । तस्करीका ति सामानसहित टिप्पर चालक रुपन्देहीको सियारी गाउँपालिका–२ निवासी ३२ बर्षीय संजित हरिजन र सहचालक उक्त स्थानकै २९ वर्षीय दीपक पत्थरकट्टालाई पनि पक्राउ परेका छन् ।

Advertisement

भैरहवा भन्सार कार्यालयका प्रमुख नारद गौतमले त्यस क्षेत्रबाट केही दिन अघिदेखि टिप्परबाट भन्सार छलिका सामानको तस्करी भैरहेको सूचना प्राप्त भएको र पक्राउका लागि एक सातादेखि निरन्तर प्रयाश गर्दा पनि टिप्पर उम्किने गरेको बताए । ‘पक्राउ गर्ने एक सातादेखिको निरन्तर प्रयास बल्ल सार्थक भएको छ’, उनको भनाइ थियो ।

उनका अनुसार, हुक्काको फ्लेबर महंगो छ र आयात गर्दा अन्तशुल्क समेत लाग्ने गर्छ । टिप्परलाई माथि भन्सार छलिका दृष्टिले चेकजाँच नहुने भएकाले तस्करीको सामान ढुवानी गर्नमा तस्करले टिप्परको प्रयोग गर्ने नयाँ जुक्ती प्रयोग गरेका हुन् । पक्राउ परेका चालक र सहचालकको बयानको आधारमा यस विषयमा थप छानबिन र अनुशन्धान जारी रहेको उनले जनाए ।

व्यत्तिगत निर्माणका कार्यमा नदीजन्य सामाग्रीको ढुवानी, क्लिकंरको कच्चा पदार्थ चुन ढुंगाको ढुवानी, क्लिंकर, कोइला लगायतका सामानको ढुवानीमा रुपन्देहीमा दैनिक अनुमानित हजारको संख्यामा सयौं टिप्पर संचालनमा हुने गर्छन् । दैनिक ढुवानीमा प्रयोगमा आउने टिप्परलाई प्रयोगमा ल्याउन बेथरी आसपास क्षेत्रमा तस्करले भन्सार छलिका सामानको गोदाम बनाई दैनिक यसरी नै ढुवानी गरि गन्तब्यमा पुर्याउने गरेको हुनसक्ने अनुमान गरिएको छ ।

यस बिषयमा छानबिन तथा अनुशन्धान जारी रहेको भन्सार प्रमुख गौतमले बताए । दुई साता अघि पनि भैरहवा भन्सार कार्यालयले भन्सार छलिगरेको १० लाख रुपैयाँ मूल्यको कपडासहित एउटा ट्रक पक्राउ गरेको थियो ।