सरकारले पूर्णता नपाउँदा बजेट तयारी प्रभावित

पब्लिक कुरा
२०८० बैशाख २६

293 Share

भैरहवा– लुम्बिनी प्रदेश सरकारले पूर्णता नपाउँदा आगामी आर्थिक वर्षको बजेट तथा नीति कार्यक्रमको तयारी हुन सकेको छैन । वर्तमान गठबन्धनमा आवद्ध दलमा सरकारमा सहभागिताका विषयलाई लिएर आन्तरिक किचलो भएपछि समस्या भएको छ । सरकारलाई पूर्णता दिने विषयमा पटकपटक छलफल भए पनि निष्कर्षमा पुग्न सकेको देखिँदैन । जसले गर्दा बजेट जस्तो महत्वपूर्ण विषय ओझेलमा परेको हो ।

लुम्बिनीमा नयाँ गठबन्धन अनुसार माओवादीसहित ८ दलको समर्थनमा कांग्रेस संसदीय दलका नेता डिल्लीबहादुर चौधरी बैशाख १४ गते मुख्यमन्त्रीमा नियुक्त भएका थिए । ८ दलका ५३ प्रदेश सभा सदस्यबाट मुख्यमन्त्री चौधरीले बैशाख १९ गते नै विश्वासको मत पाइसकेका छन् । चैत १४ गते नै अन्य तीन मन्त्रीलाई विना विभागीय मन्त्रीको सपथग्रहण खुवाएका मुख्यमन्त्री चौधरीले कांग्रेस भित्रको किचलो र सरकारलाई समर्थन गर्ने दलको ठुला मन्त्रालयको आकांक्षाले सरकार विस्तारमा सकस परेको हो ।

नयाँ गठबन्धन बनाउने बेलामै गठबन्धनका ठुला दल कांग्रेसले मुख्यमन्त्रीसहित ४ र माओवादीले ३ मन्त्रालय लिने सहमति गरेका छन् । एमाले नेता एवं पूर्वमुख्यमन्त्री लिला गिरीले लुम्बिनीका १३ मन्त्रालयलाई घटाएर १० मा झारेका थिए । त्यसले अहिलेको सरकारमा सहभागी दललाई भागबण्डा मिलाउन अप्ठ्यारो पारेको हो । १० मन्त्रालय मध्ये कांग्रेस माओवादीले ७ मन्त्रालय लिएपछि बाँकी ५ दललाई तीन मन्त्रालयमा मिलाउनु पर्ने बाध्यतामा मुख्यमन्त्री चौधरी छ । जनमोर्चाले सरकारमा नजाने बताइरहेको छ ।

गत बैशाख १५ गते मुख्यमन्त्रीसँगै माओवादीबाट धनबहादुर मास्की, नागरिक उन्मुक्तिबाट धर्मबहादुर चौधरी र लोसपाबाट सन्तोषकुमार पाण्डे मन्त्री बनेका थिए । मन्त्रालयको भागबण्डा र शक्ति बाँडफाँड नमिल्दा उनीहरुले पनि जिम्मेवारी पाएका छैनन् । प्रदेश सरकारले चैत मसान्तसम्ममा चालु वर्षको बजेट झण्डै ४० प्रतिशत मात्र खर्च गरेको छ । विभागीय मन्त्री अभावमा चालु वर्षको बजेट खर्च बढ्न सकेको छैन् । आर्थिक मामिला मन्त्रालयका उपसचिव एवं मन्त्रालयका प्रवक्ता सुरेन्द्र पाण्डेले बजेट बनाउने काम आन्तरिक रूपमा भए पनि विभागीय मन्त्री अभावमा नीतिगत निर्णय गर्न अप्ठ्यारो परेको बताए ।