दाङमा लुम्बिनी प्रदेश सभाहल निर्माण सुरु

भैरहवा– लुम्बिनी प्रदेशको राजधानी दाङको राप्ती गाउँपालिकास्थित मौरीघाटमा प्रदेशसभा बैठक सञ्चालनका लागि प्रदेश सभाहल निर्माण सुरु भएको छ । प्रदेश सरकारले अघिल्लो वर्ष दाङको भालुवाङ क्षेत्रमा स्थायी राजधानी तोकेको थियो । उक्त निर्णय प्रदेश सभाबाट पनि पारित भएको छ । अहिले प्रदेशको अस्थायी मुकाम बुटवलमा छ ।

स्थायी राजधानीमै प्रदेश सभाको बैठक राख्नका लागि सभाहल बनाउन सुरु गरिएको प्रदेश सरकारले जनाएको छ । नेपाल सरकारले लुम्बिनी प्रदेश सरकार मातहतमा राप्ती प्राविधिक शिक्षालय रहने निर्णय गरेपछि सभाहल निर्माणको काम सुरु भएको हो ।

Advertisement

राप्ती प्राविधिक शिक्षालय भित्र रहेको सभाहल सानो भएपछि नयाँ सभाहल बनाउन लागिएको लुम्बिनी प्रदेश पूर्वाधार विकास प्राधिकरणका प्रमुख कार्यकारी अधिकृत ध्रुव मजगैयाँले बताए ।

कोरोना भाइरस संक्रमणका बीच पनि अहिले धमाधम सभाहल निर्माणको काम भइरहेको छ । ‘हामीले संक्रमण फैलन नदिन गरिएको निषेधाज्ञामा समेत सावधानी अपनाएर प्रदेशसभा हल निर्माणको काम गरिरहेका छौं । राजधानीको निर्णय टुंगिएपछि स्थायी राजधानी तोकिएको क्षेत्रमा राजधानीसँग जोडिएको गुरुयोजना निर्माणसँगै पूर्वाधार निर्माण कार्य सुरु भएको हो’, मजगैयाँले भने ।

५ करोड २१ लाखको लागतमा सुविधा सम्पन्न प्रदेश सभाहल निर्माणको काम सुरु भएको उनले जनाए । सभाहल एक सय जना मानिस अटाउन सक्ने गरी बनाइँदै छ । यस्तै, सभाहलमा सभामुखको लवी, स्टेज सबै यसैभित्र निर्माण हुने छ । चालु आर्थिक वर्ष भित्र प्रदेशसभा हल निर्माणको काम सक्ने लक्ष राखिएको भए पनि निषेधाज्ञाले गर्दा निर्धारित समयमा सभाहल निर्माणको काम सम्पन्न गर्न कठिनाई हुने भएको छ ।

प्रमुख कार्यकारी अधिकृत मजगैयाँ भन्छन्, ‘सभाहल असारसम्म सक्ने योजना थियो । विविध कारणले भनेकै समयमा काम सुरु गर्न सकिएन । असोजसम्ममा सबै काम सकिन्छ कि भन्ने हाम्रो अनुमान ।’ सभाहल निर्माणको काम ड्राइगन बस्नेत जेभी निर्माण कम्पनीले गरिरहेको हो ।

प्रदेश सरकारले स्थायी राजधानीमा मन्त्रालय स्थानान्तरणको काम समेत सुरु गरेको छ । अहिले दाङमा ग्रामीण तथा शहरी विकास मन्त्रालयको कार्यालय स्थापना भैसकेको छ । बाँकी आन्तरिक मामिला तथा कानून मन्त्रालयको लागि राप्ती प्राविधिक शिक्षालय भित्र रहेको भवन खोज्न थालिएको जनाइएको छ ।

आउने आर्थिक वर्षलगत्तै देउखुरीमा आन्तरिक मामिला तथा कानुन मन्त्रालय स्थापना गर्ने योजना प्रदेश सरकारको छ । त्यसअघि बुटवलबाट मन्त्रालय, निर्देशनालय तथा अन्य कार्यालयहरु स्थायी राजधानीमा स्थानान्तरणको योजना छ ।

यता प्रदेश सरकारले प्रदेश स्थायी राजधानीको गुरुयोजना निर्माणको काम सुरु गरेको छ । तीन ओटा कन्सल्टेन्सी गुरुयोजना निर्माणका लागि छनोट भइसकेको प्रदेश पूर्वाधार विकास प्राधिकरणले जनाएको छ ।

राजधानीको गुरुयोजनाले राप्ती गाउँपालिका, गढवा गाउँपालिका वडा नम्बर १, २ र ३, शितगंगा नगरपालिका अर्घाखाँचीको वडा नम्बर ८ र ९ लाई समेटने छ । प्रशासनिक केन्द्र, शहर, कृषि क्षेत्र, शिक्षा, स्वास्थ्य, खेलकुद लगायत सबै प्रकारको क्षेत्र तोक्ने र सोही अनुसार डिजाइन बनाइने मजगैयाँले बताए ।