ग्यास अभाव हटाउन भारतसँग थप ग्यास माग

Advertisement

भैरहवा–मुलुकभर चर्किएको एलपी ग्यास अभावलाई सहज बनाउन नेपाल आयल निगमले भारतीय आयल कर्पोरेसन (आईओसी)सँग थप ग्यास माग गरेको छ ।

Advertisement

यसअघि करिब ४९ हजार ५०० मेट्रिक टन ग्यास माग गर्दै आएको निगमले यसपटक ५५ हजार मेट्रिक टन ग्यास उपलब्ध गराउन आईओसीसँग सहमति गरेको जनाएको छ ।

सुर्खेतमा आयोजित सर्वपक्षीय बैठकमा सहभागी भएका निगमका प्रवक्ता मनोज ठाकुरले बजारमा देखिएको ग्यास अभाव समाधानका लागि विगतको तुलनामा ५ हजार मेट्रिक टन बढी ग्यास माग गरिएको जानकारी दिए । उनका अनुसार निगमले ६० हजार मेट्रिक टन ग्यास माग गरे पनि आईओसीले ५५ हजार मेट्रिक टन उपलब्ध गराउने सहमति जनाएको छ ।

थप ग्यास नेपाल भित्रिएपछि अहिले देखिएको अभाव क्रमशः हट्ने भनाइ निगमको छ । प्रवक्ता ठाकुरले उपभोक्तालाई ग्यास अभाव हुने हल्लाको पछि नलाग्न र आवश्यकताभन्दा बढी सिलिन्डर सञ्चित नगर्नपनि आग्रह गरेका छन् ।

निगमका अनुसार पछिल्ला महिनामा ग्यासको माग उल्लेख्य रूपमा बढेको छ । फागुनमा ३१ हजार मेट्रिक टन, चैतमा ३८ हजार, वैशाखमा ३२ हजार र जेठमा ३३ हजार मेट्रिक टन ग्यास आपूर्ति गरिएको थियो । असारमा भने आपूर्ति बढेर ४४ हजार ५०० मेट्रिक टन पुगेको थियो । असारदेखि उपभोग बढे पनि त्यसअनुसार आपूर्ति व्यवस्थापन हुन नसक्दा बजारमा अभाव देखिएको जनाएको छ ।

नेपालमा ग्यास ढुवानी गर्ने करिब ६५० वटा बुलेट भारतीय पक्षका रहेका कारण पनि आपूर्ति व्यवस्थापनमा चुनौती थपिएको निगमले जनाएको छ । यसअघि लागू गरिएको आधा सिलिन्डर वितरण प्रणालीले समेत समस्या थप जटिल बनेको प्रवक्ता ठाकुर बताउँछन् ।

उता, उपभोक्ताले आवश्यकता भन्दा बढी सिलिन्डर सञ्चय गर्दा बजारमा कृत्रिम अभावको अवस्था देखिएको भन्दै नेपाल एलपी ग्यास उद्योग संघले अनावश्यक रूपमा ग्यास सञ्चय नगर्न आग्रह गरेको छ ।