कल बाईपास गर्ने एक व्यक्ति रुपन्देहीको सिमावर्ती क्षेत्रबाट पक्राउ

पब्लिक कुरा
२०८३ श्रावण १५

790 Share

भैरहवा–रुपन्देहीको सिमावर्ती क्षेत्रमा होटलको कोठा भाडामा लिएर मु्लुकलाई आर्थिक नोक्शानी पुर्याउने गरि अवैध रूपमा कल बाईपासमा संलग्न रहेको अभियोगमा विभिन्न उपकरण र बिदेशी सिमकार्डसहित एक जना व्यक्तिलाई प्रहरीले विभिन्न अत्याधुनिक उपकरण र नगदसहित पक्राउ गरेको छ ।

सिद्धार्थनगर नगरपालिका–१ स्थित बेलहिया बसपार्क क्षेत्रबाट ती व्यक्तिलाई जिल्ला प्रहरी कार्यालय रुपन्देही र मातहत इलाका प्रहरी कार्यालय बेलहियाबाट खटिएको संयुक्त प्रहरी टोलीले पक्राउ गरेको जिल्लाप्रहरी कार्यालय रुपन्देहीका डिएसपी तथा प्रबक्ता कृष्ण कुमार चन्दले बताए ।

बेलहिया बसपार्कस्थित न्यु मुक्ति होटल एण्ड रेष्टुरेन्टको दोस्रो तलामा कोठा भाडामा लिई बस्दै आएका गोरखा जिल्ला, चुमनुव्री गाउँपालिका–४ का ६२ वर्षीय छिरिङ गुरुङ पक्राउ परेका हुन् । उनी बसेको कोठामा खानतलासी गर्दा अवैध कल बाईपासमा प्रयोग हुने विभिन्न उपकरण र सिमकार्डहरू बरामद गरिएको प्रहरीले जनाएको छ ।

प्रहरीका अनुसार, २ थान सिमकार्ड जडान गरिएका डिभाइस, १ थान वल्र्डलिंकको राउटर, १ थान वाइफाइ–६ राउटर, ५६ थान भारतीय सिमकार्ड, नेपाल टेलिकमको सिम, चिनियाँ सिमकार्ड ३ थान, विभिन्न कम्पनीका मोबाइल ३ थान, १२ भोल्टेजको ब्याट्री १ थान, इन्भर्टर १ थान बरामद भएको छ । उनको साथबाट बागमती प्रदेश ०२–०२७ प ९५९७ नम्बरको स्कुटर, नेपाली नागरिकता भारतीय निर्वाचन कार्ड र भारतीय निर्वाचन कार्डपनि प्रहरीले बरामद गरेको छ ।

पक्राउ परेका गुरुङलाई दूरसञ्चार ऐन, २०५३ अन्तर्गत कल बाईपास सम्बन्धी कसूरमा मुद्दामा अदालतबाट कारवाही अघि बढाएर थप गहन अनुसन्धान अगाडि बढाइरहेको डिएसपी चन्दले जनाए ।
कल वाइपासबाट राजस्व तथा कर छली र सेवाको गुणस्तरमा ह्रास हुनुको साथै राष्ट्रिय सुरक्षा र गोपनीयतामा खतरा हुन गर्छ ।