२७५० मिटर सडक निर्माणपछि नजिकिए बस्ती

पब्लिक कुरा
२०८२ मंसिर १०

235 Share

बुटवल– एउटै वडामा भएर पनि भौगोलिक हिसावले टाढा रहेका बुटवल उपमहानगरपालिका वडा नम्बर १० का दुईवटा बस्ती जोड्ने पक्की सडक (हरियाली पथ) निर्माण गरिएको छ । बुटवलको रामनगर (बेसक्याम्प)देखि पूर्वी कालिकानगरको हरियाली पथ हुँदै योगिकुटी जोड्ने झण्डै २ हजार ७ सय ५० मिटर पक्की सडक निर्माण कार्य सम्पन्न भएको हो ।

कुल ३ करोड ५० लाख लागतमा ३० फिट चौडाइको सो सडक निर्माणसँगै नाला ब्यबस्थापन, सडकपेटी निर्माण, सडकपेटीमा लकटायल बिछ्याउने काम भैरहेको १० नम्बर वडा कार्यालयले जनाएको छ । यो सडक निर्माणसँगै बुटवलको पूर्वतर्फका बस्तीहरुलाई पश्चिम दक्षिणतर्फका बस्तीहरुसँग जोड्न सफल भएको र एउटै वडा भएर पनि भौगालिक हिसावले टाढा रहेका मुख्यतया दुईवटा बस्तीहरुलाई नजिक बनाएको वडाध्यक्ष बलबहादुर पुनले बताए ।

यो सडक निर्माणले दुईवटा बस्ती आवतजावतमा सहज बनाउनुका साथै बुटवलको रामनगरबाट योगिकुटीसम्मको लागि बाइपास सडकका रुपमा पनि प्रयोग गर्न सकिने वडाध्यक्ष पुनले जनाए । कालिकानगर र रामनगरको बिचमा ठुलो घना जंगल रहेको र सो जंगल नेपाली सेनाको संरक्षणमा रहेको हुनाले सडक निर्माणमा धेरै कानुनी प्रक्रिया र झमेलाहरु पनि ब्यहोर्नु परेको उल्लेख गर्दै वडाध्यक्ष पुनले सबैको सहयोग र सद्भावका कारण छोंटो समयमै पक्कि सडक निर्माण गर्न सकिएको जनाए ।

यो सडक निर्माणले खासगरि बुटवल बजारलाई छलेर बाइपासको रुपमा प्रयोग गर्ने सवारी साधनहरुलाई सहज हुनेछ । भैरहवाबाट बुटवल हुँदै पूर्वतर्फ जाने सवारी साधनहरु यसअघि राजमार्ग चौराह पुग्नुपर्ने थियो भने अव योगीकुटीबाट सिधै रामनगर निस्कन सक्नेछन् ।