लुम्बिनी प्रदेश मुख्यमन्त्री कप पुरुष भलिबलको उपाधि गुल्मीलाई

Advertisement

दाङ– दोस्रो मुख्यमन्त्री कप लुम्बिनी प्रदेश स्तरीय पुरुष भलिबल प्रतियोगिताको उपाधि गुल्मीले हात पारेको छ । शनिबार दाङमा सम्पन्न फाइनल खेलमा नवलपरासीलाई ३–० को सोझो सेटमा पराजित गर्दै गुल्मी दोस्रो पटक मुख्यमन्त्री कप पुरुष भलिबल प्रतियोगिताको उपाधि हात पार्न सफल भएको हो ।

Advertisement

गुल्मीले नवलपरासीलाई पहिलो सेट २५–१५, दोस्रो सेट २५–१३ र तेस्रो सेटमा २५–१५ ले हराएको हो । उपाधसँगै गुल्मीले नगद १ लाख, ट्रफी र मेडल हात पारेको छ ।

यस्तै, दोस्रो स्थानमा चित्त बुझाएको नवलपरासीले नगद ६५ हजार, शिल्ड, मेडल तथा प्रमाणपत्र हात पारेको छ । लुम्बिनी प्रदेशका १२ जिल्लाबाट सहभागी प्रतियोगितामा रुपन्देही तेस्रो र प्यूठान चौथो भएका छन् ।

रुपन्देहीले प्युठानलाइ ३–१ को सेटमा हराउँदै तेस्रो स्थान कायम गरेको हो भने प्यूठान चौथो भएको हो । तेस्रो भएको रुपन्देहीले नगद ३५ हजार र चौथो भएको प्युठानले १५ हजार रुपैयाँसहित प्रमाणपत्र प्राप्त गरेको छ ।