सत्ता प्राप्ति मात्र अन्तिम लक्ष्य हुनु हुँदैनः सभापति थापा

Advertisement

नेपाली कांग्रेसका सभापति गगन थापाले प्रतिपक्षविहीन संसद् बनाउने अभ्यास लोकतान्त्रिक मूल्यमान्यता अनुकूल नहुने बताएका छन् । ललितपुरमा आइतबार बिहान नयाँ पुस्तासँग नेपाली कांग्रेसका सभापति विषयक साक्षात्कार कार्यक्रममा सभापति थापाले राजनीतिक दलहरूका लागि सत्ता प्राप्ति मात्र अन्तिम लक्ष्य हुन नहुने बताए । उनले राजनीतिक दलहरूले सत्ताभन्दा विचार, नीति र सिद्धान्तका आधारमा आफूलाई निर्देशित गर्नुपर्ने बताए ।

Advertisement

थापाले पछिल्लो एक दशकको नेपाली राजनीति बढी सत्ता केन्द्रित भएको टिप्पणी गरे । ‘सत्ता र शक्ति नै सबै थोक हो भन्ने सोचबाट हामी बाहिर निस्कनुपर्छ,’ उनले भने, ‘पार्टीले आफ्ना स्थापित मूल्य, मान्यता र सिद्धान्तमा कहिल्यै सम्झौता गर्नु हुँदैन ।’ उनले प्रदेश सरकार गठनका सन्दर्भमा सबै प्रमुख दलहरू मिलेर सरकार बनाउने र प्रतिपक्षविहीन संसद् बनाउने अभ्यास लोकतान्त्रिक मूल्यमान्यता अनुकूल नहुने बताए ।

थापाले कांग्रेसभित्र नयाँ पुस्ताको सहभागिता र प्रतिनिधित्व बढाउन आवश्यक रहेको बताए । पार्टीको वैधानिक संरचनामा युवाहरूको स्थान सुरक्षित गर्न चालिएका कदमहरूबारे चर्चा गर्दै उनले भने, ‘नयाँ पुस्ताको ऊर्जा र पुराना पुस्ताको अनुभवलाई समायोजन गरेर मात्र कांग्रेसलाई थप सबल बनाउन सकिन्छ ।’ उनले नयाँ पुस्तालाई केवल मतदाता वा प्राविधिक कार्यकर्ताका रूपमा मात्र नहेरी उनीहरूको नवीन सोच र दृष्टिकोणलाई पार्टीले आत्मसात गर्नुपर्ने बताए ।