रूपन्देही–३ को उपनिर्वाचन ‘मिनी जनमत संग्रह’ होः अध्यक्ष लिङ्देन

Advertisement

भैरहवा– राष्ट्रिय प्रजातन्त्र पार्टी (राप्रपा)का अध्यक्ष राजेन्द्रप्रसाद लिङ्देनले रुपन्देही–३ मा आगामी कार्तिक १७ गते हुने उपनिर्वाचनमा काँग्रेस–एमालेका कार्यकर्ताहरुले आफ्नै पार्टी र उम्मेदवारलाई हराएर मुलुकमा सुधारको सन्देश दिनुपर्ने बताएका छन् । उनले तीन दशक सत्तामा रहेका यी दुई दल मिल्दा पनि मुलुकका लागि केही काम गर्न नसकेको, बरु भ्रष्टाचार मौलाएको जनाए ।

Advertisement

मंगलबार राप्रपा रुपन्देही क्षेत्र नम्बर ३ क्षेत्रीय कमिटीद्वारा भैरहवामा आयोजित कार्यकर्ता भेलामा बोल्दै अध्यक्ष लिङ्देनले भने, ‘उपनिर्वाचन हुँदैछ, यो सिट कुनै पार्टीले जित्नु–नजित्नुमा केही फरक पर्दैन । संसदीय अंक गणितमा कुनै प्रभाव पार्दैन । तर, यो निर्वाचनले पछिल्लोपटक कांग्रेस र एमालेको सरकारको क्रियाकलाप कस्तो रह्यो ? जनताका पक्षमा कस्ता काम भए ? प्रतिपक्षले कस्तो भूमिका खेले भन्ने परीक्षण भने हुन्छ । यसले मुलुकमा सन्देश दिन्छ र यो ‘मिनी जनमत संग्रह’ पनि हो । जनतामा चेतनाको स्तर कति माथि उठ्यो, पुरानै काम नगर्नेलाई रोजेकी मुलुक बदल्छु भन्ने पार्टी रोजे भन्ने परीक्षण पनि हो ।’

उनले अघि भने, ‘कांग्रेस र एमालेका मतदाताले पनि आफ्नो पार्टी र नेता सुधार्न चाहन्छन् भने उपनिर्वाचनमा यी पार्टीलाई हराएर सुधारको संकेत गर्नुपर्छ ।’ राष्ट्रिय स्वतन्त्र पार्टी (रास्वपा) ले लोकतन्त्र मान्छ की, राजतन्त्र मान्छ ? धर्मनिरपेक्षता, संघीयता र व्यवस्थाप्रति उसको के धारणा छ ? भन्ने केही नछुट्टिएको लिङ्देनले जनाए ।

उनले राप्रपाका बारे, अहिलेको व्यवस्थाबारे आम मतदातालाई ठीक ढंगले बुझाउनुपर्ने बताए । ‘उपनिर्वाचन मतदाताको चेतनास्तर नाप्ने समय हो’, उनले भने, ‘यो क्षेत्र विशिष्ट प्रकारको छ, नेपालको लिडिङ गर्छ । नेपालको प्रतिनिधित्ब गर्छ । त्यसैले पार्टीका सबै साथीहरु सक्रिय भएर लाग्न आग्रह गर्छु ।’ उनले निर्वाचनलाई लक्षित गरी क्षेत्रका ३६ वटै वडामा प्रचार समिति र कार्यालय खोलेर काम गर्न पार्टी पंक्तिलाई निर्देशन दिए ।

‘निर्वाचनका क्रममा म पनि सबै वडामा पुग्छु’, उनले भने, ‘उम्मेदवार को हुने भन्ने कुरामा अलमलिनु पर्दैन । समयमा उम्मेदवार आउँछ । तपाईंहरुले भनेकै मान्छे उम्मेदवार हुन्छ । म भए ठीक, नभए बेठिक भन्नू गलत हो । जसले राम्रो काम गर्छ, उहीँ उम्मेदवार बन्छ । आजबाट आकांक्षीहरु परीक्षामा बस्नु, पार्टीको काम गर्नु ।’ उनले एमालेका कार्यकर्ताहरुलाई केही नभन्न आग्रह गरे । ‘हामीसँग सहकार्य गरेर विष्णु पौडेल, छविलाल विश्वकर्मा, बासुदेव घिमिरे र हाम्रा नेता दीपक बोहराले जित्नुभयो’, उनले भने, ‘दुर्भाग्य दीपक दाई बित्नुभयो । त्यतिबेला एमालेका साथीहरुले हामीलाई पाँच वर्षका लागि भनेर भोट दिनुभएको हो । यसपटक पनि सहयोग गर्नुहुनेछ भन्ने विश्वास छ । तपाईंहरु एमालेसँग त्यहीअनुसार कुरा गर्नुस्, म पनि गरौंला ।’

उनले कांग्रेस–एमालेको वर्तमान संयुक्त सरकार ढल्छ–ढल्छ भन्ने हल्ला बेलाबेलामा आउने गरी पनि कमिसन र भागबण्डामा कुरा मिलेपछि हल्ला हल्लामै सीमित हुने गरेको सुनाए । ‘सरकार तलमाथि भयो, हामी सरकारबाट बाहिर गयौं भने हामी जेलमा जानुपर्छ भनेर फेरि मिल्छन् । हिजोको गल्तीले जेलमा जान्छौं भनेर डराउनेहरुले अब त गल्ती नगरे हुन्थ्यो’, उनले भने, ‘तर, यी दलका नेताहरुले ठेक्कापट्टा, सरुवा बढुवा, नियुक्ति, निर्णय, हरेकमा कमिसन र मानिस बेचेर पैसा खाँदैछन् । दिनको पचास लाख उठाएर युवा बेचेका छन्, कसैले सिमेन्ट छडमा पैसा बढाएर कमिसन खान्छन् । जसरी हुन्छ कमिसन खानुपर्छ भन्ने ध्यानमै मन्त्री र नेताहरु छन् ।’

खाडी मात्रै होइन्, भाषा पढेर कोरिया जाने युवाहरुसँग पनि निश्चित विमानमै जानुपर्ने नीति तोकेर कमिसन खाने काम भएको उनले आरोप लगाए । ‘अब कोरिया पनि १० लाखसम्म तिरेर म्यानपावरबाट पठाउने भनिएको छ । यो पनि लुटेर खानकै लागि हो’, उनले भने । लिङ्देनले मुलुकको सार्वजनिक ऋण ८ वर्ष अघि ६ खर्ब भए पनि अहिले २८ खर्ब नाघेको बताए ।

‘अब कर्मचारीलाई तलब दिन पनि ऋण लिने अवस्था छ । अब यो कुरा जनतालाई बुझाउनुपर्छ । यिनिहरुले देशलाई खोक्रो पारे’, उनले भने, ‘जनताले पैसा तिरेर पनि मल पाउँदैनन्, तीन दशक बढी भयो यिनिहरुले सरकार चलाएको तर मल कारखाना खोल्दैनन् । बरु अर्बौं खर्चेर मल ल्याउँछन् र कमिसन खान्छन् ।’ लिङ्देनले कुन बालीमा कुनबेला के चाहिन्छ भन्ने थाहै नभएका नेताहरु र मन्त्रीहरुले युरिया चाहिँदा डीएपी, पोटास चाहिँदा युरिया ल्याउने गरेको आरोप लगाए । ‘उनीहरुमा ज्ञान नै छैन । खाली कमिसन चाहिन्छ’, उनले भने ।

वडा सदस्यदेखि पूर्वप्रधानमन्त्री र राष्ट्रपतिसम्मका लागि विदेशीसँग ऋण लिएर पाल्न नहुने उनको तर्क छ । ‘त्यसैले केन्द्र र स्थानीय तह भए पुग्छ । प्रदेश चाहिँदैन’, उनले भने, ‘प्रदेश खारेज गरेर स्थानीय तह पनि घटाउनुपर्छ ।’ अदालत र अख्तियारमा पनि नेताहरुकै आफ्ना नियुक्त भएकाले भ्रष्टाचारीलाई कारबाही र नियन्त्रण हुन नसकेको उनले जनाए । ‘नेताले भ्रष्टाचार गर्छन् । दलका कार्यकर्ता अदालत र अख्तियारमा छन् । कहाँबाट कारबाही हुने ? त्यसैले समस्या नेतामा मात्रै होइन्, व्यवस्थामा पनि छ’, उनले भने ।

पार्टीका उपाध्यक्ष ध्रुवबहादुर प्रधानले पार्टीले सुशासन र समृद्धिको नीति लिएकाले जनतालाई बुझाउन जरुरी रहेको बताए । रुपन्देही–३ विगतमा राप्रपाले जितेको क्षेत्र भएको उपनिर्वाचनमा पनि जित जरुरी रहेको जनाए । ‘त्यसका लागि पार्टी एकढिक्का हुनुपर्छ । पार्टीले लोकप्रिय र योग्य उम्मेदवारलाई छनोट गर्छ । तपाईंहरु काममा खट्नुस्’, उनले भने । कार्यक्रममा बोल्ने केन्द्रीय सहमहामन्त्री ताहिर अली लगायतका नेताहरुले रुपन्देही र क्षेत्रमा स्वर्गीय दीपक बोहराको महत्वपूर्ण योगदान रहेकाले उपनिर्वाचनमा पनि पार्टीले जित निकाल्ने बताएका थिए ।