रूपन्देही–३ उपनिर्वाचनः एमालेमा भदौ १५ भित्र एक महिलासहित ३ जनाको नाम पठाउन निर्देशन

पब्लिक कुरा
२०८२ श्रावण १५

384 Share

भैरहवा– नेकपा एमालेले रुपन्देही क्षेत्र नम्बर–३ को उपचुनावमा उम्मेदवारका लागि भदौ १५ भित्र एक महिलासहित तीनजनाको नाम सिफारिस गर्न निर्देशन गरेको छ । निर्वाचन आयोगले कात्तिक १७ गते यो क्षेत्रमा उपनिर्वाचनको मिति घोषणा गरिसकेको छ ।

निर्वाचनको तयारीका लागि एक महिलासहित तीन जना उम्मेदवारको नाम सिफारिस गर्न जिल्ला र प्रदेश कमिटीलाई महासचिव शंकर पोखरेलले पत्र पठाएका छन् । महासचिव पोखरेलले लेखेको पत्रमा उम्मेदवार सिफारिस गर्दा निर्वाचन क्षेत्र समन्वय कमिटीले जिल्ला र प्रदेश कमिटीसँग पनि राय लिन भनिएको छ ।

पत्रअनुसार जिल्ला कमिटीले निर्वाचन क्षेत्रीय समन्वय कमिटीलाई उम्मेदवार सिफारिसका लागि जानकारी गराउनेछ । केन्द्रीय कार्यालय प्रमुख डा. भिष्म अधिकारीका अनुसार बुधबार दुवै कमिटीलाई पत्राचार गरेर भदौ १५ दिन भित्र उम्मेदवारको नाम पठाइसक्न निर्देशन गरिएको छ ।

मातहतका कमिटीबाट आएका नामलाई पार्टी केन्द्रीय सचिवालयले एक जनाको नाममा निर्णय गर्ने डा. अधिकारीले बताए । सो क्षेत्रमा २०७९ को निर्वाचनमा एमालेको समर्थनमा राप्रपाका बोहोरा विजयी भएका थिए । २०७९ मङ्सिर ४ गते भएको निर्वाचनमा निर्वाचित भएका बोहराको गत चैत १९ गते निधन भएपछि सो पद रिक्त भएको छ ।