लामिछानेलाई ‘वर्ष समालोचना सम्मान–२०८२’ प्रदान गरिने

पब्लिक कुरा
२०८२ असार १४

256 Share

भैरहवा– रुपन्देहीको भैरहवा बहुमुखी क्याम्पसका पूर्वक्याम्पस प्रमुख एवं समीक्षक तथा समालोचक प्रा.डा. कपिलदेव लामिछाने सम्मानित हुने भएका छन् । नमस्ते आधुनिक लघुकथा मञ्चले आफ्नो सातौँ वार्षिकोत्सवको अवसरमा यस वर्षको ‘वर्ष समालोचना सम्मान–२०८२’ प्रा.डा.लामिछानेलाई प्रदान गर्ने घोषणा गरेको हो ।

संस्थाका अनुसार समीक्षक तथा समालोचक लामिछानेलाई नेपाली आधुनिक लघुकथाको समीक्षा र समालोचनामा विशिष्ट योगदान पुर्याएको योगदानस्वरूप नगद ७ हजार ७ सय ७७ रूपैयाँ र सम्मानपत्रसहित सम्मान गरिनेछ । औपचारिक सम्मान समारोह आगामी कार्यक्रमअन्तर्गत चितवनको राप्ती नगरपालिकामा आयोजना गरिनेछ ।

वि.सं. २०१५ असोज २४ गते कास्की पोखराको माझठानामा जन्मिएका लामिछानेले त्रिभुवन विश्वविद्यालयबाट ‘नेपाली गाउँखाने कथा’ विषयमा विद्यावारिधि गरेका छन् । हाल उनी रुपन्देहीको सिद्धार्थनगर नगरपालिका–७ का स्थायी बासिन्दा हुन् ।

उनले ‘अन्यथा’, ‘जलमानव’, ‘बोन्साइ’ लगायत आधा दर्जन लघुकथा सङ्ग्रह, एक समालोचना कृति, करिब ५० बढी अन्य साहित्यिक कृति प्रकाशित गरिसेका छन् । लामिछानेले गीता प्रथमा रजत पदक, महेन्द्र विद्याभूषण पदक ख, मकबुल अहमद लारी स्वर्ण पदकसहित चार दर्जनभन्दा बढी सम्मान प्राप्त गरेका छन् । उनले विभिन्न साहित्यिक तथा समाजिक संस्थाको नेतृत्वसमेत गरेका छन् ।