माटो प्रयोगशाला स्थापनापछि प्रतापपुर क्षेत्रका किसान खुशी

पब्लिक कुरा
२०८१ मंसिर ११

231 Share

भैरहवा– खेतीका लागि आफ्नो जमिनको माटोको अवस्थाका वारेमा जानकारी लिन जिल्ला सदरमुकाम परासी वा अन्य जिल्लामा पुग्नु पर्ने बाध्यता पश्चिम नवलपरासीको प्रतापपुर गाउँपालिका र त्यस क्षेत्र आसपासका कृषकलाई हटेको छ । पश्चिम नवलपरासीको प्रतापपुर गाउँपालिका–९ मा माटो परीक्षण प्रयोगशाला स्थापना भएपछि यस खालको बाध्यताबाट त्यस क्षेत्रका किसान मुक्त भएका हुन् । घर आसपासमैं माटो प्रयोगशाला स्थापना भएपछि त्यस क्षेत्रका कृषक खुशी छन् ।

माटोको अवस्थाका वारेमा जानकारी भएपछि त्यही किसिमबाट खेती गर्न सकिने र माटोमा कुनै समस्या देखिएमा समाधान गर्न सकिने भएकाले कृषि उत्पादन बढ्ने विश्वास कृषकहरुको छ ।

यसअघि माटो परीक्षणको लागि सदरमुकाम परासी वा रुपन्देही पुग्नुपर्ने बाध्यतामा रहेका यस क्षेत्रका किसानलाई लक्षित गर्दै प्रतापपुर गाउँपालिकाले माटो परीक्षण प्रयोगशाला सञ्चालनमा ल्याएको गाउँपालिका अध्यक्ष उमेशचन्द्र यादवले बताए । प्रयोगशाला स्थापना भएपछि अब माटोको अवस्थाका आधारमा खेतीपाती गर्न सजिलो हुने भनाई उनको छ ।

‘किसानहरूमा माटो परीक्षण गर्नुपर्छ भन्ने जनचेतनाकै कमी रहेको अवस्थामा प्रयोगशाला टाढा हुँदा सेवा लिन पाउने अवस्था थिएन,’ अध्यक्ष यादवले भने, ‘माटोको परीक्षणबिना नै खेती गर्नू र परीक्षण गरेर खेती गर्नुले किसानलाई धेरै फरक पार्ने छ ।’
प्रयोगशालाले माटोमा भएको पोटास, नाइट्रोजन, फस्फोरस लगायतका ५ वटा तत्वहरुको परीक्षण गरेर किसानलाई आवश्यक सुझाव दिने छ । यो प्रयोगशाला संचालन भएपछि पश्चिम नवलपरासी जिल्लाको दक्षिणी भेगका किसानले माटो परीक्षणको लागि जिल्लाबाहिर जानुपर्ने बाध्यता हटेको छ ।