ट्रकले ठक्करबाट श्रीमतीको मृत्यु, श्रीमान घाइते

बाँके- पूर्व-पश्चिम राजमार्गअन्तर्गत बाँकेको ढकेरी नजिक ट्रकले मोटरसाइकललाई ठक्कर दिँदा मोटरसाइकलमा सवार एक जनाको मृत्यु भएको छ।

पश्चिमतर्फ आइरहेको भे ११ प ७०५ नम्बरको मोटरसाइकललाई सोही दिशाबाट आइरहेको ना ५ ख ४२०४ नम्बरको ट्रकले ठक्कर दिँदा मोटरसाइकलमा सवार दीपिका खत्रीको मृत्यु भएको इलाका प्रहरी कार्यालय, कोहलपुरले जानकारी दिएको छ।

Advertisement

मोटरसाइकलमा बाँके बैजनाथ गाउँपालिका वडा नं. २ का दिलबहादुर कटुवाल र उनकी श्रीमती खत्री सवार थिए।

ट्रकको ठक्करबाट घाइते भएका श्रीमान र श्रीमती दुवैलाई कोहलपुर मेडिकल कलेजमा उपचारका लागि लगिएको थियो। उपचारको क्रममा श्रीमतीको मृत्यु भएको हो।

इलाका प्रहरी कार्यालय, कोहलपुरका डिएसपी ऐनबहादुर मल्लका अनुसार ट्रक र चालकलाई प्रहरीले नियन्त्रणमा लिएको छ। मृतकका आफन्तीले अहिले पूर्वपश्चिम राजमार्ग अवरुद्ध गरेका छन्।