काँग्रेस महाधिवेशनपछि नागरिकता विधेयक पास हुन्छ : गृहमन्त्री खाँण

भैरहवा– गृहमन्त्री बालकृष्ण खाँणले कोही पनि नागरिक नागरिकताबिहीन हुनु नपर्ने बताएका छन् । नेपाली काँग्रेसको महाधिवेशन पछि प्रतिनिधि सभामा विचाराधीन नागरिकता विधेयकलाई परिस्कृत गरी पास भएपछि सबैले नागरिकता पाउने उनले बताए ।

Advertisement

बिहीबार भैरहवामा आयोजित नेपाली काँग्रेसको लुम्बिनी प्रदेशको प्रथम अधिवेशनमा बोल्दै गृहमन्त्री खाँणले नगरिकता प्राप्त गर्ने उमेर पुगेका हजारौं–लाखौं नागरिक नागरिकताविहीन भएको बताउँदै त्यसलाई काँग्रेस नेतृत्वको सरकारले समाधान गर्ने दावी गरे । ‘पूर्ववर्ती सरकारले अध्यादेशमार्फत् ल्याएको विधेयक सर्वोच्च अदालतले अघि बढ्न दिएन’, उनले भने, ‘सदन चलेपछि विशेयक पास हुन्छ । तर, त्यसलाई केही परिमार्जन र परिस्कृत भने गरिने छ ।’

Advertisement

काँग्रेस केन्द्रिय सदस्यसमेत रहेका खाँणले नागरिकता नभएकै कारण राष्ट्रिय विकास र मूल धारमा समावेश हुनबाट धेरै नागरिक बञ्चित भएको जनाए । ‘नागरिकताबिहीनको समस्या राष्ट्रको समस्या हो, यो तपाईँको मात्रै होइन, हाम्रो पनि समस्या हो’, उनले भने ।

यस्तै उनले भूूमिहीनलाई जग्गा व्यवस्था गर्न राष्ट्रिय भूूमि आयोग गठन गरिएको बताए । ‘स्थानीय चुुनाव अगाडि भूमिहीन र अव्यवस्थित बसोबासीलाई लालपुर्जा वितरण गरिने छ’, उनले भने, ‘यसबारे सम्बन्धित पक्षलाई जानकारी दिनसमेत तपाईंहरुलाई आग्रह गर्छुु ।’

खाँणले सरकारले गरेका राम्रा कुराका बारेमा कांग्रेस कार्यकर्ताले प्रचारप्रसार नगरेको गुुनासोसमेत गरे । रुपन्देहीले सर्वसम्मत नेतृत्व चयन गरेको बताउँदै उनले प्रदेशमा पनि सर्वसम्मत गर्नुुपर्ने बताए । ‘कसको कति मत हिसाव गरेनौं । अब प्रदेशमा पनि सर्वसम्मत गरौं’, उनले भने, ‘भरत शाहलाई सभापति चयन गरौं । बाँकी पद बांडौं । आज राती नै सहमति गरौं । सर्ब सम्मतीको परम्परालाई निरन्तरता दिऔं । हामीलाई यही बिश्वास छ ।’

उमेरको आधारमा नेतृत्व नहुने उनले बताए । ‘अमेरिकामा ओवामा युवा थिए । मत जितेर राष्ट्रपति बन्नुुभयो । अहिले ७७ वर्षीय जो वाइडेन राष्टपति छन् । त्यसैले उमेर आधार हुँदैन’, उनले भने । उमेरका आधारमा भन्दा समयको आवश्यकता र परिस्थितिका आधारमा निर्णय गर्न पर्ने उनले बताए ।

‘हाम्रो कार्यकालमा धेरै राम्रो काम गर्न सकेनौं, चुुनाव जित्न सकेनौं’, उनले भने, ‘तर नेपाली कांग्रेसलाई फुट्न दिएनौं । जनतालाई तिलस्मी सपना देखाउनेहरु बहुमत ल्याएर पनि जुट्न सकेनन् । त्यसैले पार्टीमा एकता पहिलो आवश्यकता हो ।’

तीन दिनसम्म चल्ने अधिवेशन लुुम्बिनी प्रदेशको नेतृत्व चयन गर्ने छ । संस्थापन पक्षबाट प्रतिनिधिसभाको सार्वजनिक लेखा समिति सभापति समेत रहेका नेता भरतकुुमार शाह र संस्थापनइतरबाट रोल्पाका नेता अमरसिंह पुुनले उम्मेवारी दिने तयारी गरेका छन् ।