March 29, 2024, Friday
१६ चैत्र २०८०, शुक्रबार

मङ्सिरमा राप्रपाको महाधिवेशन

राष्ट्रिय प्रजातन्त्र पार्टीको केन्द्रीय विशेष समितिको बैठकले पार्टीको केन्द्रीय महाधिवेशन आगामी मङ्सिर ११ देखि १३ गतेसम्म काठमाडौँमा गर्ने निर्णय गरेको छ।

Advertisement

यही कात्तिक २७ देखि ३० गतेसम्म गर्ने भनिएको सो अधिवेशन प्राविधिक कारणले केही साता सार्ने निर्णय बैठकले गरेको हो। पार्टीका केन्द्रीय सदस्य सुन्दर पाण्डेले बैठकले सक्रिय सदस्य बनाउने अवधि कात्तिक १५ गतेसम्म बढाउने निर्णय गरेको जानकारी दिए।

Advertisement

बैठकले केन्द्रीय निर्वाचन समितिलाई कात्तिक २६ गतेभित्र सक्रिय सदस्यको नामावली जिल्लामा पठाउन निर्देशन दिएको छ। सक्रिय सदस्यको दाबी विरोध यही कात्तिक २७ देखि २९ गते गर्ने, अन्तिम नामावली ३० गते प्रकाशन गर्न निर्वाचन समितिलाई जिम्मेवारी दिएको बैठकले सक्रिय सदस्यको नामावली पार्टीको वेबसाइट तथा जिल्ला पार्टी कार्यालयमा राखी सार्वजनिक गर्न, जिल्ला अधिवेशन कात्तिक २३ गतेभित्र सम्पन्न गर्न, सातवटै प्रदेशसभाबाट प्रदेश कार्यसमितिको निर्वाचन कात्तिक २८ गते गर्ने निर्देशन दिएको छ।

सक्रिय सदस्यबाट महाधिवेशन प्रतिनिधिको निर्वाचन आगामी मङ्सिर १ देखि ३ गते गर्ने, जिल्ला कार्यसमितिसँग समन्वय गरी प्रदेशसभा निर्वाचन क्षेत्रीय कार्यसमितिले निर्वाचनका लागि आवश्यक व्यवस्थापन गर्ने कार्यसूची तय गरेको छ।

महाधिवेशनको तयारीका लागि विभिन्न नौ समिति गठन गरेको बैठकले सामाजिक कार्यपत्र तयारी समितिको संयोजकमा पशुपतिशम्शेर जबरालाई जिम्मेवारी तोकेको छ। आर्थिक कार्यपत्र तयारी समितिको संयोजकमा डा प्रकाशचन्द्र लोहनी, राजनीतिक कार्यपत्र तयारी समितिको संयोजकमा कमल थापा छन्।

बैठकले कार्यक्रम तथा व्यवस्थापन समिति, भोजन व्यवस्था समिति, स्वास्थ्य समिति, प्रचारप्रसार समिति, स्वागत समिति र स्वयंसेवक परिचालन समिति गठन गरेको छ।