October 18, 2021, Monday
१ कार्तिक २०७८, सोमबार

वडाध्यक्षले गरे कोटहीमाईमा तालाबन्दी

भैरहवा– कर्मचारी तथा जनप्रतिनिधिहरु कार्यालय रित्तै हुने गरी पालिकामा नआएको भन्दै रुपन्देही दणिक्षी क्षेत्र मर्चवारमा पर्ने कोटहीमाई गाउँपालिकामा तालाबन्दी गरिएको छ ।

आइतबार गाउँपालिकामा वडा अध्यक्षले तालावन्दी गरेका हुन् । वडा नम्बर ३ का अध्यक्ष चन्द्रभान यादव र ४ का अध्यक्ष ओमप्रकाश पाण्डेले असार मसान्तमा जनताको काम गर्ने बेलामा कोही पनि पालिका कार्यालयमा नआएकाले तालाबन्दी गरिएको जनाए ।

‘यस्तोबेला दु्रत गतिमा काम हुनुपर्ने हो तर कार्यालयमा जनप्रतिनिधि र कर्मचारी नै आउँदैनन्’, वडा नम्बर ३ का अध्यक्ष यादवले भने, ‘यसैले हामीले तालाबन्दी गरेका हौं ।’ वडाध्यक्षहरुले गाउँपालिकामा अध्यक्ष, उपाध्यक्ष, प्रमुख प्रशाशकीय अधिकृत, लेखा अधिकृत र प्राबिधिक कोही पनि कार्यालयमा नआएको बताएका छन् ।

गाउँपालिकामा राजनीतिक प्रतिशोधका कारण तालावन्दी गरिएको अन्य जनप्रतिनिधिको आरोप छ । गाउँपालिका अध्यक्ष र उपाध्यक्ष तत्कालीन उपेन्द्र यादव निकट हुन भने ताला लगाउने दुबै अध्यक्ष तत्कालीन राष्ट्रिय जनता पार्टीका नेता सवेन्द्रनाथ शुक्ला निकट मानिन्छन् ।

केन्द्रमा महन्थ ठाकुर र उपेन्द्र पक्षबीच आरोप–प्रत्यारोप तथा राजनीतिक हानथाप चलिरहेका बेला त्यही प्रतिशोध साँध्न पालिकामा तालाबन्दै गरिएको आरोप अन्य जनप्रतिनिधिको छ ।

गाउँपालिकाका प्रमुख प्रशाशकीय अधिकृत दुर्गा गौडले तालाबन्दीबारे आफूलाई जानकारी नभएको बताए । ‘म बिरामी भएका कारण कार्यालय जान सकेको छैन । यसबारे मलाई जानकारी भएन’, उनले भने ।