अख्तियारद्वारा सर्भेक्षक विन्देश्वर साहविरुद्ध भ्रष्टाचार मुद्दा

Advertisement

नवलपरासी–अख्तियार दुरुपयोग अनुसन्धान आयोगले नापी कार्यालय पश्चिम नवलपरासीमा कार्यरत सर्भेक्षक विन्देश्वर साह सुडीविरुद्ध गैरकानुनी रूपमा सम्पत्ति आर्जन गरेको आरोपमा भ्रष्टाचार मुद्दा दायर गरेको छ ।

Advertisement

आयोगले विशेष अदालत, काठमाडौँमा साहविरुद्ध ३ करोड ७१ लाख ८४ हजार ५५१ रुपैयाँ बिगो कायम गर्दै आरोपपत्र दर्ता गरेको हो । साहले २०४६ माघ १६ गते सरकारी सेवामा प्रवेश गरेदेखि २०८१ जेठ ३२ गतेसम्मको अवधिमा कुल ६ करोड ३ लाख ८५ हजार ३० रुपैयाँ वैधानिक आय आर्जन गरेको देखिएको तर, सोही अवधिमा उनको खर्च तथा लगानी भने ९ करोड ७५ लाख ६९ हजार ५८१ रुपैयाँ पुगेको आयोगले जनाएको छ ।

अनुसन्धानका क्रममा साहले जग्गा तथा सेयर खरिद, सवारीसाधन खरिद, ऋण तथा सापटी भुक्तानीलगायतका विभिन्न शीर्षकमा उक्त रकम खर्च तथा लगानी गरेको खुलेको छ । वैधानिक आयको तुलनामा ३ करोड ७१ लाख ८४ हजार ५५१ रुपैयाँ बढी खर्च तथा लगानी भए पनि त्यसको स्रोत खुलाउन नसकेको अख्तियारको दाबी छ ।

साहले आफूले आर्जन गरेको भनिएको गैरकानुनी सम्पत्ति लुकाउने उद्देश्यले श्रीमती सुमिन्त्रा देवी साहको नाममा समेत जग्गा र अन्य क्षेत्रमा लगानी गरेको आयोगले जनाएको छ । गैरकानुनी रूपमा आर्जित सम्पत्ति जफत गर्ने प्रयोजनका लागि सुमिन्त्रा देवीलाई समेत आयोगले प्रतिवादी बनाइएको छ ।