जेनजी आन्दोलनको नाममा रुपन्देहीमा लुटपाट र आगजनी गर्ने ४० जना पक्राउ

पब्लिक कुरा
२०८२ पुष ४

482 Share

भैरहवा–जेनजी समूहको आन्दोलनका क्रममा रुपन्देही जिल्लाका विभिन्न सरकारी तथा निजी भौतिक संरचनामा लुटपाट, आगजनी तथा तोडफोडमा संलग्न रहेको अभियोगमा प्रहरीले ४० जनामाथि कानुनी कारवाही अघि बढाएको छ ।

जिल्ला प्रहरी कार्यालय रुपन्देहीका डिएसपी तथा प्रबक्ता सुरज कार्कीले गत भदौ २३ र २४ गते भएको उक्त घटनामा संलग्न रहेको अभियोगमा रुपन्देही प्रहरीले उनिहरुलाई विभिन्न मितिमा पक्राउ गरि छानबिन गर्दै कानुनी प्रकृया अघि बढाइएको पब्लिककुरासँग बताए । ‘मंसिर महिनामामात्रै २३ जनालाई पक्राउ गरि छानबिन जारी राखिएको छ भने हालसम्म ४० जनालाई पक्राउ गरि कानुनी प्रकृया अघि बढाइएको छ’ कार्कीले भने, ‘जेनजी आन्दोलनको नाममा तोडफोड, लुटपाट र आगजनी गर्नेको खोजी कार्य जारी छ ।’

प्रहरीका अनुसार मंसिर महिनामा पक्राउ परेकामध्ये सिद्धार्थनगर नगरपालिका–७ स्थित भाटभटेनी सुपरमार्केट भैरहवा शाखामा तोडफोड, आगजनी तथा खाद्य र नगद चोरी गरेको घटनामा ६ जनालाई नियन्त्रणमा लिइएको छ ।

सिद्धार्थनगर–६, गल्लामन्डीस्थित अस्थायी प्रहरी बिटमा तोडफोड र आगजनी गरी कागजात तथा प्रहरी पोसाक जलाएको अभियोगमा २ जना पक्राउ परेका छन् । तिलोत्तमा नगरपालिका–५, मणिग्रामस्थित ड्रिमल्यान्ड गोल्ड रिसोर्ट एन्ड होटेलमा आक्रमण, तोडफोड र आगजनी गरी क्षति पुर्याएको घटनामा २ जनालाई नियन्त्रणमा लिइएको छ । देवदह नगरपालिका–९, घोडाहामा नगरप्रमुख ध्रुवप्रसाद खरेलको निजी घरमा अनधिकृत रूपमा प्रवेश गरी धनमाल चोरी गर्दै आगजनी र तोडफोड गरेको आरोपमा ८ जनालाई पक्राउ गरिएको प्रहरीले जनाएको छ ।

यस्तै तिलोत्तमा नगरपालिका–७, मङ्गलापुरस्थित इलाका प्रहरी कार्यालय, प्रहरी बिट र अस्थायी प्रहरी पोस्टमा रहेका सवारी साधन, फर्निचर, विद्युतीय सामग्री तथा प्रहरी पोसाकमा आगजनी र तोडफोड गरेको घटनामा ५ जना पक्राउ परेका छन् ।