पाल्पा–२ मा राना सहित पाँच जनाको नाम सिफारिस

Advertisement

Advertisement

भैरहवा–आगामी फागुन २१ गते हुने प्रतिनिधि सभा निर्बाचनका लागि नेपाली काँग्रेसले पाल्पाको निर्वाचन क्षेत्र नम्बर – २ मा वीरबहादुर रानासहित पाँच जनाको नाम सिफारिस गरेको छ । राना लुम्बिनी प्रदेशसभा सदस्य हुन् ।

क्षेत्रीय कमिटीले सबैको नाम जिल्लामा सिफारिस गरेको हो । रानासँगै पार्टी सभापति हिमालदत्त श्रेष्ठ, मीना पन्थी, कृष्णप्रसाद बस्याल र महेश्वरी कुँवरको नाम पनि सिफारिस गरिएको क्षेत्रीय सभापति मुक्तिराम जीसीले जनाएका छन् ।

हरेक निर्वाचन क्षेत्रबाट तीन जनाको नाम जिल्ला कमिटीमा सिफारिस गर्नु पर्ने भए तापनि आकांक्षीको संख्या बढी भएकाले सर्वसम्मतिमै पाँच जनाको नाम सिफारिस गरिएको हो । पाल्पा २ प्रतिनिधिसभा समानुपातिकतर्फ कांग्रेसका पूर्वजिल्ला सभापति राजन पन्त, जिल्ला सचिव सुनिता अधिकारी, मुस्लिम नेता जमिला मियाँ, नेतृ बसन्ती घिमिरे उम्मेदवार सिफारिस गर्ने निर्णय गरेको छ ।

२०७९ सालमा भएको प्रतिनिधिसभा सदस्य निर्वाचनमा पाल्पा–२ मा नेपाली कांग्रेसको उम्मेदवार थिएनन् । पाल्पा २ बाट प्रतिनिधिसभा सदस्यमा एमालेका ठाकुरप्रसाद गैरे निर्वाचित भएका थिए ।

प्रतिनिधिसभा सदस्य पाल्पा १, मा प्रत्यक्षतर्फ युवा नेता सन्दीप रानाको नाम सर्वसम्मत भएको छ ।