१२औं शेरबहादुर सेन्चुरी अन्तरविद्यालय क्रिकेट मंसिर १२ देखि

Advertisement

भैरहवा– १२औं संस्करणको स्वर्गीय शेरबहादुर सेन्चुरी स्मृति अन्तरविद्यालय टी–२० क्रिकेट प्रतियोगिता यही मंसिर १२ गतेदेखि हुने भएको छ । आयोजक संस्था रुपन्देही क्रिकेट संघले बुधबार भैरहवामा पत्रकार सम्मेलन गरी प्रतियोगिताबारे जानकारी दिएको हो । पुस १ गतेसम्म चल्ने प्रतियोगिताका लागि पर्वत ज्वेलर्स भैरहवाका संचालक विमल सेन्चुरीले प्रायोजन गरेका छन् । आफ्ना स्वर्गीय हजुरबुवाको स्मृतिमा सेन्चुरीको प्रयोजनमा विगतदेखि यो प्रतियोगिता हुँदै आएको छ ।

Advertisement

भैरहवास्थित सिद्धार्थ क्रिकेट मैदानमा हुने प्रतियोगितामा रुपन्देहीका ३० वटा विद्यालयको सहभागिता रहने खेल संयोजक उदयकुमार मल्लिकले जानकारी दिए । उनका अनुसार यसवर्ष विगतका वर्षहरुमा भन्दा ६ वटा विद्यालयको सहभागिता बढेको छ । प्रतियोगितामा कक्षा १० सम्मका खेलाडीहरु सहभागी हुन पाउने छन् ।

प्रतियोगिताको विजेता टिमले नगद ५० हजार र उपविजेताले २५ हजार रुपैयाँसहित ट्रफी, मेडल र प्रमाणपत्र प्राप्त गर्ने छन् । यस्तै, म्यान अफ द सिरिजले १० हजार, बेष्ट बलर र बेष्ट ब्याटरले समान ५–५ हजार, प्रत्येक खेलको म्यान अफ द म्याचले ५ सय रुपैयाँ र अनुसाशित टिमलाई पनि पुरस्कृत गरिने कार्यक्रम संयोजक मल्लिकले बताए ।

रुपन्देही क्रिकेट संघका अध्यक्ष हरिबहादुर थापाले विद्यालयस्तरमा हुने यस्ता प्रतियोगिताले खेलाडी उत्पादनमा टेवा पुग्ने बताए । उनले हरेक वर्ष सिजनको पहिलो प्रतियोगिता विद्यालय तहको गराउँदै आएको बताउँदै यसले रुपन्देहीमा खेल प्रतिभाहरुको उजागर भइरहेको जनाए । विद्यालयस्तरमा लुकेका प्रतिभाहरुलाई बाहिर ल्याउन यो प्रतियोगिताले महत्वपूर्ण योगदान गरेको उनको भनाई छ ।

लुम्बिनी प्रेस क्लबका उपाध्यक्ष दीपेन्द्र बडुवालले क्रिकेटर जन्मने भनेकै विद्यालय तहबाट भएकाले यस्ता प्रतियोगिताको योगदान अतुलनीय रहने जनाए । उनले रुपन्देही क्रिकेट संघले विभिन्न प्रतियोगिताहरु गरेर खेलाडीहरुलाई अवसर सिर्जना गरेको बताए । प्रतियोगिता सम्पन्न गर्न ५ लाख रुपैयाँ खर्च लाग्ने आयोजकले जनाएका छन् ।