कोहलपुरमा अटो तथा ई–रिक्सा सञ्चालन गर्न दर्ता अनिवार्य

पब्लिक कुरा
२०८३ भाद्र ४

140 Share

नेपालगन्ज–बाँकेको कोहलपुर नगरपालिकाले नगर क्षेत्रमा सञ्चालन भइरहेका अटो तथा विद्युतीय रिक्सा (ई–रिक्सा) लाई व्यवस्थित गर्नकालागि अनिवार्य रूपमा नगरपालिकामा सूचीकृत गर्नुपर्ने व्यवस्था लागू गरेको छ ।

निर्धारित समयभित्र सूचीकृत नभएका सवारीसाधनलाई नगर क्षेत्रमा सञ्चालन गर्न उक्त नगरपालिकाले नदिने भएको छ ।

नगरपालिकाले सार्वजनिक सूचना जारी गर्दै अटो तथा ई–रिक्सा व्यवसायी तथा चालकलाई सात दिनभित्र आवश्यक कागजातसहित सूचीकरण गर्न आग्रह गरेको हो । ‘अटो तथा विद्युतीय रिक्सा सञ्चालन, व्यवस्थापन तथा नियमनसम्बन्धी कार्यविधि, २०७९’ अनुसार नगर क्षेत्रमा सञ्चालन अनुमति लिनुअघि नगरपालिका कार्यालयमा सूचीकृत हुनुपर्ने व्यवस्था रहेको नगरपालिकाले जनाएको छ ।

नगर प्रमुख पूर्णप्रसाद आचार्यले नगरपालिकामा सूचीकरण भएका अटो तथा ई–रिक्साको पहिचानका लागि नगरपालिकाले विशेष स्टिकर उपलब्ध गराउने र बिना दर्ता सञ्चालन गरिएका सवारीसाधनलाई नियन्त्रणमा लिएर प्रचलित कानुनअनुसार कारबाही गरिने बताएका छन् ।

सूचीकरणका लागि यातायात व्यवस्था कार्यालयमा दर्ता भई नवीकरण गरिएको सवारी दर्ता किताबको प्रतिलिपि, बिमा कागजात, चालक अनुमतिपत्र र सवारीधनीको नागरिकता प्रमाणपत्रको प्रतिलिपि आवश्यक पर्नेछ ।

नगरपालिकाका प्रमुख प्रशासकीय अधिकृत मानबहादुर गिरीले नगर क्षेत्रमा अटो तथा ई–रिक्साको संख्या बढ्दै गएकाले तिनको व्यवस्थित अभिलेख राख्न, पहिचान गर्न र प्रभावकारी नियमन गर्न सूचीकरण अनिवार्य गरिएको जनाए ।