मुख्यमन्त्री आचार्यद्वारा मन्त्रिपरिषद् विस्तारको तयारी

Advertisement

दाङ– लुम्बिनी प्रदेशका मुख्यमन्त्री चेतनारायण आचार्यले विश्वासको मत दिने सबै राजनीतिक दललाई सरकारमा सहभागी गराउने गरी मन्त्रिपरिषद् विस्तारको तयारी गरेका छन् । मुख्यमन्त्री आचार्यले प्रदेश सभाबाट विश्वासको मत प्राप्त गरेसँगै मन्त्रिपरिषद् विस्तारको तयारी अघि बढाएका हुन् ।

Advertisement

मुख्यमन्त्री आचार्यले भदौ १ गते प्रदेश सभामा भएको मतदानमा ४५ मत प्राप्त गरी विश्वासको मत पाएका थिए । नेपाली कांग्रेसको समर्थनमा २०८१ साउन ७ गते मुख्यमन्त्री नियुक्त भएका आचार्यले कांग्रेसले समर्थन फिर्ता लिएपछि पुनः विश्वासको मत लिएका थिए ।

नेकपा (एमाले) र नेकपाका शीर्ष तहका नेताबीच भएको सहमतिअनुसार लुम्बिनीसहित सातै प्रदेशमा सरकारको नेतृत्व र सत्ता समीकरणमा फेरबदल भएको छ । सोही सहमतिअनुसार एमाले संसदीय दलका नेतासमेत रहेका आचार्यको नेतृत्वमा लुम्बिनी प्रदेशमा सरकार गठन भएको हो ।

मुख्यमन्त्री आचार्यलाई एमालेसँगै नेकपा, राष्ट्रिय जनमोर्चा र जनता समाजवादी पार्टी नेपालले विश्वासको मत दिएका छन् । विश्वासको मत दिने सबै दललाई सरकारमा सहभागी गराउने गरी मन्त्रिपरिषद् विस्तारको तयारी भइरहेको जानकारी मुख्यमन्त्री आचार्यले दिएका छन् ।

उनका अनुसार लुम्बिनीमा मुख्यमन्त्रीसहित ९ सदस्यीय मन्त्रिपरिषद् बनाउने सहमति भएको छ । हाल एमालेबाट मुख्यमन्त्रीसहित पाँच जना र जनता समाजवादी पार्टी नेपालबाट २ जना मन्त्री सरकारमा सहभागी छन् ।

जसपा नेपालका भण्डारीलाल अहिरले आन्तरिक मामिला, कानुन, उद्योग तथा यातायात मन्त्रालयको जिम्मेवारी लिएका छन् । एमालेबाट तुलसीप्रसाद चौधरीले कृषि, भूमि व्यवस्था तथा सहकारी, डिल्लीराज भुसालले सहरी विकास, ऊर्जा, सिँचाइ तथा खानेपानी, रामजीप्रसाद घिमिरेले स्वास्थ्य तथा रत्नबहादुर खत्रीले भौतिक पूर्वाधार विकास मन्त्रालयको जिम्मेवारी लिएका छन् ।

बाँकी तीन मन्त्रालय नेकपालाई दिने विषयमा सहमति भएको नेकपा लुम्बिनी प्रदेश सभा संसदीय दलका नेता जोखबहादुर महराले जनाएका छन् । महराका अनुसार पछिल्लो सहमतिअनुसार एमालेले मुख्यमन्त्रीसहित चार, नेकपाले तीन तथा साना दललाई एक–एक मन्त्रालय दिने विषयमा छलफल जारी छ ।

‘अहिले यसै विषयमा छलफल भइरहेको भएपनि अहिलेसम्म टुङ्गो लागेको छैन’, महराले भने, ‘विश्वासको मत दिएका साना दललाई पनि सरकारमा सहभागी गराउने गरी छलफल जारी छ ।’
मन्त्रालयको सँख्या र बाँडफाँड टुङ्गो लागेपछि आफ्नो दलबाट मन्त्रीको नाम पठाउने उनले जनाएका छन् ।

मुख्यमन्त्री आचार्यले पनि दलहरूबीच मन्त्रिपरिषद् विस्तारका विषयमा सहमति नजिक पुगिसकेको र एक–दुई दिनभित्रै मन्त्रिपरिषद् विस्तार गर्ने तयारी भइरहेको जनाएका छन् ।