रेसुंगा विमानस्थलबाट सातामा चार उडान

Advertisement

गुल्मी– यहाँको रेसुंगा विमानस्थलबाट सातामा चार उडान हुने भएका छन् । यसअघि तीन उडान हुँदै आएका थिए । त्यसलाई बृद्धि गरेर साप्ताहिक चार उडान बनाइएको हो । पछिल्लो तालिका अनुसार प्रत्येक साता आइतबार, मंगलबार, बिहीबार र शनिबार उडान हुने रेसुंगा विमानस्थल गुल्मीका स्टेसन प्रमुख सुमन थापाले बताए ।

Advertisement

गुल्मी–काठमाडौं हवाई भाडा तीन हजार रुपैयाँभन्दा बढीले वृद्धि भएको छ । हवाई इन्धनको मूल्यवृद्धिसँगै भाडादर नयाँ कायम भएको हो । नयाँ भाडादरअनुसार गुल्मी–काठमाडौं १० हजार ७ सय रुपैयाँ र काठमाडौं–गुल्मी १० हजार ९ सय रुपैयाँ कायम भएको रेसुंगा विमानस्थल गुल्मीका स्टेसन प्रमुख थापाले जनाए ।

यसअघि गुल्मी–काठमाडौं ७ हजार ३ सय रुपैयाँ र काठमाडौं–गुल्मी ७ हजार ५ सय रुपैयाँ रहेको थियो । रेसुंगा विमानस्थलमा नेपाल वायुसेवा निगमको १८ सिट क्षमताको ट्विनअटर जहाजले उडान भर्दै आएको छ । स्टेसन प्रमुख थापाका अनुसार काठमाडौंदेखि बिहान साढे ६ बजे र रेसुङ्गादेखि बिहान साढे ७ बजे उडान भर्ने गरेको छ ।

पहाडी जिल्ला हवाई सेवासँग जोडिएपछि पर्यटकको संख्यामा केही हदसम्म भए पनि वृद्धि र यात्रुको चाप अत्यधिक हुने गरेको छ । खराब मौसम हुँदा उडान स्थगित हुने यस विमानस्थलबाट दुई वर्ष अघि नियमित उडान शुभारम्भ भएको थियो ।