पाकिस्तानी महिलाका श्रीमान् पनि काठमाडौंबाट पक्राउ

Advertisement

भैरहवा– गहना चोरी आरोपमा कपिलवस्तुबाट पक्राउ परेका दुई पाकिस्तानी महिलाका श्रीमानलाई प्रहरीले नियन्त्रणमा लिएर अनुसन्धान अगाडि बढाएको छ । एयर अरेबियाको जहाजमार्फत मुलुक छाड्न लागेका उनीहरुलाई शनिबार प्रहरीले पक्राउ गरेको थियो । गत चैत ३० गते कपिलवस्तुको तौलिहवा र चन्द्रौटा बजारमा पाकिस्तानी नागरिक २० वर्षीया वेबी कलसुम र ४१ वर्षीया सर्वना रहमान पक्राउ परेका थिए ।

Advertisement

श्रीमती पक्राउ परेपछि १८४८०७१ भएका २३ वर्षीय इफान अली र राहदानी नम्बर एक्यू ५९८८१०३ भएका पाकिस्तानी नागरिक ४४ वर्षीय सफिउर रहमान जहाज चढ्न लाग्दा पक्राउ परेका हुन् । अली कलसुमका र सफिउर सर्वनाका श्रीमान् हुन् । दुवै जनाबाट पाकिस्तानी राहदानी बरामद भएको छ । महिलासित सोधपुछ गर्ने क्रममा श्रीमानसँगै नेपाल आएको बताएका थिए ।

त्यसपछि श्रीमान् पक्राउ गर्न सफल भएको जिल्ला प्रहरी कार्यालय कपिलवस्तुका प्रवक्ता डीएसपी रिपेन्द्रकुमार सिंहले बताए । प्रहरीले दुवैलाई कपिलवस्तु ल्याएर सोधपुछ गरिरहेको छ । दुवैमाथि अनुसन्धानका लागि सोमबार ८ दिनको म्याद थप गरिएको थियो ।

शिवराज–५, चन्द्रौटास्थित सुरेन्द्र सुनचाँदी पसलमा गहना खरिद गर्ने भन्दै दुवै महिला साँझ पसल पुगेका थिए । त्यहाँ गहना हेर्दै व्यवसायीलाई अलमल्याएर ३८ लालको एक जोडी सुनको झुम्का चोरेर भागेका थिए । त्यसै दिन तौलिहवास्थित बागेश्वरी ज्वेलर्स सुनचाँदी पसलमा महिलाले ठगी गरेर भागेका थिए । सुन साट्ने भन्दै एक तोलाभन्दा बढीका गहना मागेर साथीलाई देखाउने बहानामा भागेका थिए । ती महिलाले ठगी गरेको जानकारी पाएपछि पसल सञ्चालकले प्रहरीमा जाहेरी दिएका थिए ।