भैरहवामा रवि लामिछानेसँग लिइयो करिब १० घण्टा बयान, सोधियो ५० प्रश्न, बयान बिहीबार पनि हुने

Advertisement

भैरहवा– राष्ट्रिय स्वतन्त्र पार्टी (रास्वपा)का सभापति रवि लामिछानेको रुपन्देहीमा बुधबार करिब १० घण्टा बयान लिइएको छ । बुटवलस्थित सुप्रिम सहकारी संस्थामा सर्वसाधरणले बचत गरेको रकम ठगी आरोपमा रविमाथि बुधबार बिहान १० बजेबाट साँझ सवा ७ बजेसम्म ९ घण्टा बढी बयान लिइएको जिल्ला सरकारी वकिल कार्यालय, रुपन्देहीले जनाएको छ ।

Advertisement

जिल्ला सरकारी वकिल कार्यालय, भैरहवामा रविको मंगलबारबाट बयान लिन सुरु गरिएको थियो । मंगलबार कास्कीबाट रुपन्देही ल्याइएका लामिछानेसँग मंगलबार र बुधबार पनि बयान नसकिएपछि बिहीबार पुनः लिइनेछ । जिल्ला न्यायाधिवक्ता प्रेमराज पौडेल, इलाका प्रहरी कार्यालय बुटवलका डीएसपी विजयराज पण्डित, प्रहरीका अनुसन्धान अधिकारीहरु लगायतको उपस्थितिमा रविको बयान भइरहेको छ ।

जिल्ला न्यायाधिवक्ता प्रेमराज पौडेलले बुधवार बयान लिँदै गर्दा रातपरेपछि बिहीवार बिहानसम्मका लागि बयान स्थगित गरिएको जनाए । सभापति लामिछानेसँग लिइएको बयानलाई अन्तिम रुप र नम्बरिङको कार्य बाँकी रहेकोले बिहीवार बिहानदेखि पुनः बयान लिइने उनले बताए । ‘उहाँ (रवि) को बयान सकिएको छैन । भोलि (बिहीवार) पनि बयान हुन्छ’, उनले भने, ‘अनुसन्धान प्रतिवेदन तयार भएको छैन । प्रतिवेदन तयार भएपछि मुद्दा चल्ने वा नचल्ने टुंगो लाग्छ ।’

पौडेलले बयान लिने काम अन्तिम चरणमा पुगेको बताए । ‘बयान अन्तिम चरणमा पुगेको छ’, उनले भने, ‘भोलि कतिबेला सकिन्छ एकीन छैन । तर, भोलि बयान पुनः हुनेछ ।’ रविसँग बुधबार करिब ५० प्रश्नमा सवाल–जवाफ भएको छ ।

जिल्ला न्यायधिवक्ता पौडेलले प्रश्नको नम्बरिङ नभएको जनाए पनि सरकारी वकिल कार्यालय स्रोतका अनुसार ५० हाराहारी प्रश्न रविलाई सोधिएको छ । पौडेलले रविलाई सोधिएको प्रश्नको सामान्य रुपमा जवाफ दिएको बताए । ‘उहाँ (रवि)जीलाई हामीले स्वास्थ्य अवस्थाबारे सोधेका थियौं, ठिक छ, जवाफ दिन सक्छु भन्नुयो’, उनले भने, ‘त्यसैले प्रश्न–उत्तर समान्य रुपमा भएको छ ।’ उनले रविसँग सहकारी बचत रकम ठगी आरोपमा बयान लिइएको बताए । रविलाई आज जिल्ला प्रहरी कार्यालयकाे हिरासतमा राखिएको छ ।

लामिछानेलाई बयानका लागि जिल्ला सरकारी वकिल कार्यालय प्रवेश गराउँदा र बाहिर निकाल्दा प्रहरीले कडा सुरक्षासहितको घेरा दिएको थियो । मंगलबार बयानपछि कार्यालयबाट बाहिरिनेक्रममा रविले ‘खोरमा बाघलाई थुन्दैमा स्याल हुँदैन’ भन्ने प्रतिक्रिया दिएपछि प्रहरीले आज उनलाई घेरा हालेर सरकारी वकिल कार्यालय लैजाँदा र फर्काउँदा कडाई गरेको थियो ।

सरकारी वकिल कार्यालय स्रोतका अनुसार रविले आफूमाथि लागेको आरोप इन्कार गरेर बयान दिएका छन् । रविको बिहीबार बिहानदेनि पुनः बयान हुने छ । रविको भित्र बयान भइरहँदा रास्वपा नेताकार्यकर्ताले आज पनि भैरहवामा प्रदर्शन गरेका छन् । भैरहवाको बुद्धचोकमा जम्मा भएका रास्वपा नेताकार्यकर्ताले नगर परिक्रमा गर्दै विरोध जनाएका हुन् । बुद्धचोकमा आयोजित कोणसभामा पार्टीका उपसभापति डीपी अर्यालले आफ्ना उम्काउने र विपक्षीलाई राजनीतिक प्रतिशोधमा पक्राउ गरेर अनुसन्धानको नाममा दुःख दिने गरेको जनाए ।

बुटवलस्थित सुप्रिम सहकारी ठगी आरोपमा लामिछानेमाथि अनुसन्धान भइरहेको छ । रास्वपाले भैरहवाको विद्रोहीचोक र मिलनचोकमा पनि कोणसभा गरेको छ । राष्ट्रिय झण्डासहित रास्वपाले प्रदर्शन गरिरहेको हो । सुप्रिम सहकारी संस्थाको १४ करोड २९ लाख रुपैयाँ गोर्खा मिडिया नेटवर्क प्रालि लगिएको आरोप छ । बुटवलस्थित सुप्रिम सहकारीबाट एक करोड ९६ लाख रवि लामिछानेकै नाममा र १४ करोड २९ लाख रुपैयाँ विभिन्न व्यक्तिमार्फत गोर्खा मिडिया नेटवर्कमा पुगेको संसदीय छानबिन विशेष समिति र प्रहरीको प्रतिवेदनमा उल्लेख छ ।