यादका तरंगहरू

मैले बोकेको
यो जीवनरूपी किताबमा
जब यादका पानाहरू
पल्टाउँदै पल्टाउँदै
अनायास हराएको
त्यो समय खोज्छु,
म फेरि आफैँमा हराउँछु
त्यही समयसँगै
यी यादहरू पनि
सुगन्धजस्तै फैलिँदा रहेछन्
मनभरि, मुटुभरि, आँखाभरि
र, मस्तिष्कभरि !

Advertisement

यी स्मृतिहरू पनि
हावाजस्तै उड्दा रहेछन्
अदृश्य र
खुला आकाशभरि
यी सम्झनाहरू पनि
अनवरत बग्दा रहेछन्
नदी, खोलानाला र झरना सरी
कहिल्यै नमेटिने
यी यादका तरंगहरू
निरन्तर चल्दा रहेछन्
पलपल चलिरहने श्वासप्रश्वास सरी !

(गुल्मी) -baahrakhari