कर दिवसका अवसरमा उत्कृष्ट करदातालाई सम्मान

पब्लिक कुरा
२०८२ मंसिर १

312 Share

भैरहवा–राष्ट्रिय कर दिवस २०८२ को अवसरमा आन्तरिक राजस्व कार्यालय भैरहवाले उत्कृष्ट करदातालाई सम्मान गर्दै बिद्यमान कर प्रणालीका वारेमा बिचार बिमर्स कार्यक्रम सम्पन्न गरेको छ ।

भैरहवास्थित सिद्धार्थ उद्योग वाणिज्य संघको सभाहलमा सोमवार उक्त कार्यक्रमको आयोजना गरि विजार्ड फ्रेग्रेन्स इण्डष्ट्रिज मायाँदेवी–८ लाई उत्कृष्ट कारदाताको रुपमा सम्मान गरिएको हो । आव २०८०।०८१ मा आयकरतर्फ उक्त इण्डष्ट्रिजले सवैभन्दा धेरै आयकर दाखिला गरेर आन्तरिक राजस्व कार्यालय भैरहवाको कार्यक्षेत्रबाट उतकृष्ट करदाता घोषित भएको हो ।

कार्यक्रममा बोल्दै रुपन्देहीका सहायक प्रमुख जिल्ला अधिकारी मेघनाथ पाध्याले समाजको रुपान्तरणमा राज्यका निकायसँग स्थानीय उद्योगी व्यवसायीहरुको भूमिका महत्वपूर्ण रहने बताए ।

आन्तरिक राजस्व कार्यालय भैरहवाका प्रमुख राजस्व अधिकृत प्रेमराज पोखरेलले कुनैपनि करदातालाई धरपकड र दुःख दिने कार्य आन्तरिक राजश्व कार्यालय भैरहवाबाट नभएको दाबी गर्दै करदाताको सहयोग र सहकार्यले चालु आर्थिक वर्षमा सरकारले दिएको लक्ष्यभन्दा बढि कर असुल गर्न सफल भएको बताए । कर कार्यालयमा कुनैपनि खालको समस्या आएमा करदातालाई आँफुले सहजिकरण गर्ने गरेको उनले बताए । अव कर बुझाउदा राजस्व कार्यालयले क्यूआरबाट गर्न मिल्ने प्रणालीको विकास केहि महिनामा हुने उनले जनाए ।

सिद्धार्थ उद्योग वाणिज्य संघ रुपन्देहीका अध्यक्ष नेत्र प्रसाद आचार्यले राज्यले कर असुली गर्ने तर उद्योगी व्यवसायीलाई राज्यले दिनुपर्ने सुविधा नभएको बताए । राज्यले लिने कर प्रणाली व्यवसायीको स्वेच्छिक हुनुपर्ने र राज्यले लिने करबाट उद्योग व्यवसायी र त्यही देशका जनताका लागि स्वास्थ्य, शिक्षा र रोजगारमा क्षेत्रमा लगानी गर्ने प्रावधान हुनुपर्ने भनाइ उनको थियो ।

उद्योग व्यापार संगठन रुपन्देहीका अध्यक्ष सचिन रोक्काले कर तिर्न सरकारले व्यवसायीलाई वातावरण तयार गर्न जरुरी रहेको बताए । राज्यलाई सहज रुपमा कर तिर्नका लागि करदातालाई उत्साहित गर्न राज्यले भुमिका खेल्नुपर्ने उनले बताए । सिद्धार्थ सञ्चालका अध्यक्ष अनिल कुमार ज्ञवालीले नेपालको कर प्रणालीमा अहिले पनि सुधार गर्नुपर्ने आवश्यकता रहेको औंल्याए ।

तिलोत्तम उद्योग वाणिज्य संघका वरिष्ठ उपाध्यक्ष सुरज पंगेनी, वरिष्ठ लेखापरिक्षक शिवहरी शर्मा, डिआर शर्मा लगायतले कर प्रणाली पारदर्शी र राजश्व प्रशासनमा कर छली हुन नदिने वारेमा सजग रहनु पर्ने बताएका थिए ।