परासीबाट सवारी लाइसेन्स बितरण भएपछि सेवाग्राहीलाई सहज

परासी– पश्चिम नवलपरासीको जिल्ला सदरमुकाम परासीबाट सवारी चालक अनुमतिपत्र बितरण सुरु गर्न थालिएपछि पश्चिम नवलपरासी, रुपन्देही र कपिलबस्तु जिल्लाका वासिन्दालाई सेवा लिन धेरै सहज भएको छ ।

Advertisement

यस अघि यस क्षेत्रका वासिन्दालाई सवारी चालक अनुमतिपत्र लिन तथा नविकरण गर्न बुटवलको बेलवास नै पुग्नु पर्ने बाध्यता थियो । बुटवलको बेलबासबाटमात्र सवारी चालक अनुमतिपत्र प्रदान र नविकरण गर्नुपर्दा अत्याधिक चापका कारण सेवाग्राहीले धेरै सास्ती खेप्दै आएका थिए ।

सवारी चालक अनुमतिपत्र लिन र नविकरणका लागि सेवाग्राहीले धेरै दिनसम्म भिडमा ठेलमठेल गर्नु पर्ने, यातायात कार्यालयका कर्मचारीलाई ज्युहजुरी गर्दै खुशी बनाउनु पर्ने वा अतिरिक्त रकम समेत उपलब्ध गराउनु पर्ने अवस्था सेवाग्राहीलाई थियो ।

पश्चिम नवलपरासीको परासीमा रहेको यातायात व्यवस्था सेवा कार्यालयबाट लुम्बिनी प्रदेशका उद्योग, पर्यटन तथा यातायात मन्त्री प्रचण्ड विक्रम न्यौपानेले चालक अनुमति पत्र वितरणको सुरुआत गरेका हुन् ।

२०७८ सालमा स्थापना भएको यस यातायात सेवा कार्यालयबाट यसअघि दुईपांग्रे सवारीसाधनको सवारी अनुमति पत्र जारी र नवीकरण हुँदै आएको थियो । जिल्लामा नै चालक अनुमति पत्र वितरण सुरु भएपछि रुपन्देही जानुपर्ने बाध्यता हटेको छ ।

परासीमा रहेको यातायात कार्यालयबाट अहिलेसम्म ७ हजार दुईपांग्रे सवारी अनुमति चालक वितरण गरेको कार्यालय प्रमुख श्याम न्यौपानेले बताए । चालु आर्थिक वर्षको पुस महिनासम्म ९ करोड राजस्व संकलन भएको छ ।

बुटवलको बेलवासस्थित यातायात कार्यालयमा भिड भउको अवस्थामा सेवाग्राहीलाई परासी जान बिकल्प उपलब्ध भएको छ । परासीबाट सवारी लाइसेन्स जारी गर्न थालिएपछि बुटवलमा हुने गरेको सेवाग्राहीको चापमापनि स्वतः कमी आउने छ ।