पूर्णक्षमतामा विमानस्थल चलाउन टिकट, ग्राउण्ड ह्याण्डलिङ र हवाइ इन्धनमा सहुलियत

पब्लिक कुरा
२०८१ श्रावण ३१

306 Share

भैरहवा– निर्माण सम्पन्न भएको २७ महिनासम्म पनि पूर्णक्षमतामा सञ्चालनमा आउन नसकेका भैरहवास्थित गौतम बुद्ध अन्तर्राष्ट्रिय विमानस्थल सञ्चालन गर्नका लागि सरकारले टिकट, ग्राउण्ड ह्याण्डलिङ र हवाइ इन्धनमा सहुलियत दिने भएको छ । यो सुविधा पोखरा अन्तर्राष्ट्रिय विमानस्थलमा पनि लागू हुनेछ ।

दुईवटै विमानस्थल पूर्णक्षमतामा सञ्चालन गर्ने विकल्प र उपायहरूबारे अध्ययन गर्न बनेको कार्यदलले दिएका सुझावका आधारमा प्रधानमन्त्रीको नेतृत्वमा सम्बन्धित मन्त्रालयका मन्त्री र पदाधिकारीसहित बसेको बैठकले उक्त सहुलियत दिने तयारी गरेको हो । यसअघि सरकारले स्वास्थ्य परीक्षण, अभिमुखीकरण तालिम केन्द्र, बिमा, श्रम स्वीकृत जारी गर्ने कार्यालय र म्यानपावर कम्पनीहरु लगायतका भैरहवामा स्थापना निर्णय गरेको छ । केही समय अघि सरकारले थाई एयर एसियालाई भैरहवाका लागि साताको चार उडान गर्ने अनुमति दिएको थियो ।

संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले दुई अन्तर्राष्ट्रिय विमानस्थल पूर्ण क्षमतामा सञ्चालनमा ल्याउन हवाई टिकट, ग्राउन्ड ह्याण्डलिङ, हवाइ इन्धनमा आगामी २०८३ साल भदौसम्म सहुलियत दिने कार्ययोजना बनाएको बताए । कार्यदलले दिएको सुझाव र एयरलाइन्सहरुले खोजेको सहुलियतका आधारमा सरकारले उक्त कार्ययोजना बनाएको भनाइ मन्त्री पाण्डेको छ ।

पर्यटन बोर्डले प्रतिटिकट लिने शुल्क पनि उक्त अवधि भर यि विमानस्थलको हकमा नलिने गरी सरकारले सहुलियत दिन लागेको उनले बताएका छन् । यसैगरि, हवाई टिकटमा लगाउने गरेको भ्याट पनि आगामी २०८३ भदौसम्म यि दुई बिमानस्थलका लागि नलिने योजना छ ।

उनका अनुसार, काठमाडौंको विमानस्थलमा भन्दा भैरहवामा इन्धनको मूल्य सस्तोमा लिने गरी कार्ययोजना बनेको छ । उद्योग वाणिज्य मन्त्रालयसँगको समन्वयमा यो कार्ययोजना बनेको हो । अध्यागमन कार्यालय सञ्चालन, भिसा सेन्टरको लागि श्रम र परराष्ट्र मन्त्रालयले व्यवस्थापन गर्ने योजना बनेको छ ।

विमानस्थलमा क्वारेन्टाइन सम्बन्धि चेकजाँचका लागि कृषि तथा पशुपक्षी मन्त्रालयले गर्नुपर्ने गरी कार्ययोजना मन्त्रीपरिषद्मा पेस भएको छ । सरकारले विमानस्थलमा दिने यस खालको सहुलियतले दुईवटा विमानस्थल संचालन गर्न धेरै सहज हुने र पूर्ण क्षमतामा संचालन गर्नका लागि सहज बातावरण बन्ने अपेक्षा सरकाले राखेको मन्त्री पाण्डेले बताए ।

यि दुई बिमानस्थल राष्ट्रिय गौरवका आयोजना र मुलुकका लागि रणनीतिक महत्वका परियोजना भएकाले पूर्ण क्षमतामा सञ्चालनका निम्ति सरकारका सम्पूर्ण निकायले समन्वयकारी रूपमा समाधान खोज्ने प्रयास गरिरहेको उनले जनाए । भैरहवाको विमानस्थल संचालनमा नआउँदा निजी क्षेत्र निकै निरास छ । यस्तोबेला सरकारको पछिल्लो पहलले केही आशा पलाएको सिद्धार्थ उद्योग बाणिज्य संका अध्यक्ष ठाकुरकुमार श्रेष्ठले बताए ।

‘हामीले विगत लामो समयदेखि गरेको प्रयासले विस्तारै पूर्णता पाउँदैछ । निजी क्षेत्रका लागि सरकारका पछिल्लो कदम सह्रानीय छन्’, उनले भने, ‘निजी क्षेत्रले सबै किसिमको सहयोग गर्छ । तर सरकारले जसरी हुन्छ भैरहवाबाट दैनिक उडान भर्नुपर्छ ।’ उनले विमानस्थललाई लक्षित गरी गरिएको लगानी डुब्ने स्थितिमा पुगेको भन्दै चाँडै विमानस्थल पूर्णक्षमतामा नचले धेरै लगानीकर्ता पलायन हुने जनाए । ‘निजी लगानीसँगै सरकारी लगानी जोगाउन पनि अब ढिलाई गर्नुहुन्न’, उनले भने, ‘पर्यटन मन्त्रालयको पहल र प्रधानमन्त्रीको सक्रियताले भइरहेका पछिल्ला निर्णय चाँडै कार्यान्वयनमा आओस् ।’