आरोहणका लागि थप ५७ वटा हिमाल खुल्ला गर्ने तयारी

भैरहवा– आरोहणयोग्य हिमाल खुल्ला गर्दै जाने नीति बमोजिम सरकारले थप ५७ हिमाल आरोहणका लागि खुला गर्ने तयारी गरेको छ । आरोहणका लागि खुल्ला गर्न लागिएको हिमाल पूर्वमा पूर्व ताप्लेजुङदेखि पश्चिम डोल्पा र हुम्लासम्मका विभिन्न चुचुरो छन् । पर्यटन बिभागले आरोहणका लागि ५७ वटा थप हिमाल खुल्ला गर्नका लागि सिफारिशसहित आवश्यक प्रकृया अगाडि बढाएको छ ।

Advertisement

पर्यटन विभाग निर्देशक राकेश गुरुङले नेपाल पर्वतारोहण संघ (एनएमए) सँगको सहकार्यमा थप हिमाल खुला गर्ने गरी सूची छनोट गरिएको बताएका छन् । हिमाल प्रवद्र्धनमा निजी क्षेत्रको अनुभव भएकाले नेपाल पर्वतारोहण संघको सहकार्यमा आरोहण खुला गर्ने हिमालको छनौट गरिएको उनले बताएका छन् ।

सरकारले सर्वोच्च शिखर सगरमाथासहित अहिलेसम्म ४ सय १९ हिमाल चुचुरो आरोहणका लागि खुला गरेको छ । आरोहण खुल्लाका लागि सिफारिश गर्न लागिएका हिमाल ५ हजार मिटरदेखि ६ हजार ५ सय मिटर उचाइसम्मका छन् । पर्यटन मन्त्रालयले सिफारिश गरेको सिफारिशलाई संस्कृति, पर्यटन तथा नागरिक उड्डयन मन्त्रालयले मन्त्रिपरिषद्मा प्रस्ताव लैजाने र मन्त्रीपरिषद्बाट स्वीकृत भएपछि आरोहणका लागि खुला हुने प्राबधान छ ।

सरकारको आर्थिक वर्ष २०८०–८१ को बजेट तथा नीति तथा कार्यक्रममा आरोहणयोग्य हिमाल क्रमशः खुला गरिने उल्लेख थियो । आरोहणका लागि सरकारले सगरमाथालाई मात्र प्राथमिकता दिने गरेको र अन्य हिमाल प्रवद्र्धनमा ध्यान दिन नसकेको गुनासो आरोहण तथा पर्यटनसंग सम्बद्ध सरकोकारवाला निकायले गर्ने गरेका थिए ।

पर्यटन विभागले आरोहणका लागि खुल्ला गर्न लागिएका हिमालका वारेमा धार्मिक, सांस्कृतिक र भौगोलिक प्रतिकूलताका कारण खुला गर्ने वा नगर्ने सम्बन्धमा कुनै दाबी–विरोध भए जानकारी गराउन आव्हान गरिसकेको छ । दावी बिरोधका लागि सम्बन्धित स्थानीय तहमा समेत पत्राचार गरिएको छ ।

कुनै–कुनै हिमाललाई स्थानीय स्तरमा कुनै जाती तथा समुदायले देवता तथा दैवी शक्तिको रुपमा मान्ने र प्रजाआजा गर्ने प्रचलनपनि रहने गरेकाले स्थानीय तह मार्फत् दावी–बिरोधकाका लागि पत्राचार गरिएको पर्यटन विभागका निर्देशक गुरुङले बताएका छन् ।

धार्मिक आस्था जोडिएका हिमाललाई सरकारले बेलाबेला बन्द गर्ने गरेको छ । खुल्ला गरिएकामध्ये अहिलेसम्म १८ वटा हिमाल आरोहणकालागि बन्द गरिएका छन् । ४ सय १९ हिमाल आरोहणमा आरोहण खुला गरे पनि ६८ वटा हिमालमा भने अहिलेसम्म कसैले पनि आरोहण गरेको छैन ।