July 23, 2024, Tuesday
२०८१ श्रावण ८

भैरहवामा ‘जाउँ है पोखरा’

भैरहवा– आन्तरिक पर्यटन प्रबद्र्धनका लागि ‘जाउँ है पोखरा’ अभियान संचालन गरेको होटल संघ पोखरा नेपालले शनिवार भैरहवामा पर्यटन प्रबद्र्धनात्मक कार्यक्रम सम्पन्न गरेको छ । मंसिर २९ गतेदेखि थालिएको उक्त अभियान पुस ४ गतेसम्म भैरहवा हुँदै नेपालगञ्ज, धनगढी र महेन्द्रनगरसम्म पुर्याउने योजना पोखरा होटल संघको छ । शुन्य अवस्थामा रहेको पोखराको आन्तरिक पर्यटनलाई कसरी चलायमान बनाउने ? भनेर झण्डै २ दशकअघिदेखि पोखराका पर्यटन व्यवसायीले यो अभियान संचालन गर्दै आएका छन् ।

Advertisement

होटल संघ पोखरा नेपालका अध्यक्ष लक्ष्मण सुवेदीले कुनै एक ठाउँमा आएका स्वदेशी तथा बिदेशी पर्यटकलाई नेपालको अन्य पर्यटकीय स्थलहरुमा पनि कसरी पुर्याउन सकिन्छ ? भन्ने वारेमा पर्यटन व्यवसायीबीच साझा योजनाकासाथ अघि बढ्नका लागि अभियान संचालन गरिएको बताए । पोखरा पुग्ने अत्याधिक भारतीय पर्यटकको आगमनको श्रोत तथा नाका सुनौली–भैरहवा रहेको उनले जनाए । ‘लुम्बिनी, भैरहवा र पोखरा आएका पर्यटकलाई एक अर्को ठाउँमा कसरी पठाउन सकिन्छ ? भन्ने वारेमा साझा योजना बनाउन जरुरी छ’, सुवेदीले भने, ‘आन्तरिक पर्यटन नै हाम्रो दीगो पर्यटन भएकाले आन्तरिक पर्यटनको प्रबद्र्धन साझा रुपमा गर्न जरुरी छ ।’

Advertisement

नेपाल भ्रमण बर्ष, पर्यटन बर्ष जस्ता विभिन्न नाममा राज्यले पर्यटन व्यवसायीलाई लगानी गर्न उत्साहित बनाउने तर पर्यटन व्यवसाय थलिएको वेलामा पनि संरक्षणका लागि कुनै कार्यक्रम ल्याउन नसकेको गुनासो उनले गरे । उनका अनुसार, कोभिडपछि पोखरामा २५ प्रतिशत पर्यटन व्यवसायी पलायन भएका छन् । सन् २०२६ सम्ममा पोखराको पर्यटन पुरानै लयमा फर्काउने लक्ष्य राखिएको छ ।

संघले पोखरा र गण्डकी प्रदेशका अन्य स्थल घुम्न ५ वटा प्याकेज सार्वजनिक गरेको छ । प्याकेज अन्तर्गत घुमघाम पोखरा, शैक्षिक भ्रमण, मधुमास, पोखरा–मुक्तिनाथ र पदयात्रा प्याकेज छन् । होटलमा बस्ने, खाने र घुम्ने सम्बन्धी यी प्याकेज दुई रात देखि चार रातसम्मका र तीन हजारदेखि २६ हजार मूल्यबीचका रहेका छन् ।

आन्तरिक पर्यटन नै दिगो पर्यटनको आधार हो भन्ने मान्यता अनुरुप दुई दशक अघि संचालित अभियानले भौरहवाका अतिरिक्त नेपालगंज, धनगढी र महेन्द्रनगर पनि समेटेको छ र अभियान ४ पुस सम्म चल्ने संघका उपाध्यक्ष दीपक श्रेष्ठले जानकारी दिए ।

भैरहवामा आयोजित कार्यक्रमा सिद्धर्थ होटल संघका अध्यक्ष चन्द्रप्रकाश श्रेष्ठले उद्घाटनको १८ महिना पुग्दा पनि गौतम बुद्ध अन्तर्राष्ट्रिय विमानस्थल उचित रुपमा संचालनमा नआउनु दुर्भाग्य भएको बताए । विमानस्थलबाट नियमित अन्तर्राष्ट्रिय उडान संचालन गर्न आफूहरुको दबाबमूलक आन्दोलन जारी रहेको उनले सुनाए ।

पत्रकार माधव ढुंगानाले पोखरा र गौतम बुद्ध विमानस्थलको यथोचित संचालनका लागि सरकारलाई एकीकृत दबाब दिनुपर्ने सुझाव राखे । पोखरा पर्यटन परिषद्का अध्यक्ष पोमनारायण श्रेष्ठले पोखराको नयाँ विमानस्थलबाट अन्तर्राष्ट्रिय उडानका लागि सरकारलाई दबाब दिइएको र आफूहरुको धैर्यताको बाँध टुटे आन्दोलन गर्न बाध्ये हुने चेतावनी दिए । विमानस्थल संचालन सम्बन्धि मुद्दामा परिषद्को ऐक्यबद्धता रहेको उनले सुनाए ।

पर्यटन विकास परिषद् लुम्बिनीका कार्यकारी अधिकृत रामु जोशीले पर्यटनलाई अब फरक र एकीकृत ढंगले अगाडि बढाउनुपर्ने भनाई राखे । भारतीय पर्यटकका पाँच सय गाडी बेलहिया नाकाबाट पार हुने गरेको जानकारी पनि उनले दिए । पत्रकार नरेश केसीले पोखरा, लुम्बिनी र चितवनलाई समेटेर गोल्डेन ट्र्याङ्गलको अबधारणा अगाडि बढाउनु पर्ने सुझाव राखे ।

देशमा १० वर्षे द्वन्द्व चल्दै गर्दा सुरु गरिएको जाउँ है पोखरा अभियानको प्रभाव सकारात्मक पर्दै गएको र अभियानकै कारण देशैभरि नेपालीमा घुम्ने बानीको विकास भएको अध्यक्ष सुवेदीले जानकारी दिए । अहिले पोखरा पुग्ने पर्यटक मध्ये ३५ प्रतिशत हिस्सा नेपालीको रहने गरेको उनले सुनाए । गएको कात्तिक महिनामा पूर्वी नेपालका विभिन्न शहरमा पनि संघले यो अभियान संचालन गरेको थियो । कार्यक्रममा नेपाल पर्यटन बोर्डका वरिष्ठ अधिकृत कुन्दन मिश्रले बोर्डको गठन, बनावट, उद्देश्य र गतिविधिबारे जानकारी गराए । नाट्टा लुम्बिनी प्रदेश अध्यक्ष रचना पन्तले पनि कार्यक्रममा भनाई राखेकी थिइन् ।

पश्चिमबाट पर्यटकलाई पोखरा पठाउने र पोखराबाट समेत पर्यटकलाई पश्चिम पठाउने उद्देश्य पनि कार्यक्रमले लिएको छ । कोभिड १९ बाट थला परेको पर्यटनलाई लयमा फर्काउन समेत यो अभियानले बल दिने आयोजक संघका महासचिव राजेन्द्र ढकालले बताए । पोखराका एक हजार दुई सय होटलमा ४० हजार जनालाई एकैदिन सेवा दिन सक्ने क्षमता रहेको र यी होटलमा १५ हजार जनाले रोजगारी पाएको संघले जनाएको छ ।