नापी कार्यालयबाट जग्गाको कित्ता गायव

बर्दिया– जिल्ला सदरमुकाम गुलरिया नगरपालिका–९ स्थित खालेपुरुवाका मुसर्रफ शेष अंशवण्डा भएपछि जग्गाको कित्ताकाट गर्न एक महिना अघि नापी कार्यालय पुगे । त्यहाँ उनको नाममा रहेको जग्गाको कित्ता अर्कैकोमा दर्ता रहेको पाइयो । त्यो देखेपछि उनी आश्चर्यमा परे ।

Advertisement

नापी कार्यालयकै कर्मचारीको मिलेमतोमा यसरी कित्ता गायब पारिएको उनले पब्लिक कुरासित गुनासो पोखे । ‘उक्त जग्गामा हुर्काइएका ११ वटा सागुन, दुईवटा ऑप र एउटा कटहरको रुख काटेर लगे,’ उनले भने, ‘जग्गा छुट्याउने नाममा अमिनले ४ हजार रुपैयाँ मागेका थिए, दिन सक्दिनँ भनेपछि यस्तो गरेको हुन सक्छन् ।’ अमिनले जग्गाको कित्ता अर्कैको नाममा गरेर रुख कटाउन लगाएको उनले आरोप लगाए ।

Advertisement

रुख कटान भए लगतै गाउँमा विवाद भयो । त्यसपछि अमिनले कित्ताकाट सुधारेर पुनः शेषको नाममा मिलान गरेको पाइएको छ । रुख काटेको क्षतिपूर्ती पाएनन् । नापी कार्यालयका प्रमुख किशन सिंह विष्टले कर्मचारीले नाजायज रकम माग्ने र काम ढिलासुस्ती गरेको जानकारी सेवाग्राहीबाट नआएको बताए । समस्यामा परेका सेवाग्राही कार्यालय प्रमुखसँग आफ्ना गुनासो लिएर आउन आग्रह गरे ।

पीडित सेवाग्राहीले तलदेखि माथिसम्म सेटिङमा हुने काम समाधान हुनेमा आशंका गरेका छन । नियमनकारी निकायले नापी जस्ता नागरिकसँग प्रत्यक्ष जोडिएको सेवा प्रदान गर्ने कार्यालयको अनुगमन गरि सेवा प्रभावकारी बनाउन सके राहत हुने स्थानीय बताउँछन् ।