एनआईसी एशिया बैंकको लुम्बिनी शाखामा केही समय तालाबन्दी

भैरहवा– बैंकले ज्यादती गरेको आरोप लगाउँदै लुम्बिनीस्थित एनआईसी एशिया बैंक लिमिटेडको शाखा कार्यालयमा केही समय व्यवसायी र सेवाग्राहीले तालाबन्दी गरेका छन् । उनीहरुले आइतबार लुम्बिनी पुगेर बैंकको शाखा कार्यालयमा तालाबन्दी गरेका हुन् । चेम्बर अफ कमर्स, रुपन्देही (उद्योग व्यापार संगठन, रुपन्देही) का अध्यक्ष अनिल कुमार ज्ञवालीले बैंकले व्यवसायी र सेवाग्राहीमाथि अति नै ज्यादती गरेपछि तालाबन्दी गरिएको बताए । उनले एनआईसी एशिया बैंकले उद्योगी व्यवसायी र सेवाग्राहीलाई दुःख दिएको आरोप लगाए । ८–९ प्रतिशत ब्याजदरमा ऋण दिने भनेर बैंकले सम्झौता गर्ने अनि १८ प्रतिशतसम्म ब्याज लिने गरेको उनको आरोप छ ।

Advertisement

होटल व्यवसायी अकरामुद्दिन खानले बैंकले व्यवसायीको मनोबल गिराउने कार्य गरेको जनाउँदै अब चुप लागेर नबस्ने जनाए । होटल व्यवसायी मेघनाथ आचार्यले एनआईसी एशिया बैंकले झुटको खेती गरिरहेको आरोप लगाए । उनले एउटा व्यक्तिले ऋण तिर्छु भन्दाभन्दै व्यवसायीलाई झुक्याइएको बताए । उनले बाध्य भएर तालाबन्दी गर्नुपरेको बताए ।

Advertisement

होटल आकाश इन्टरनेशनल प्रालिका प्रबन्ध निर्देशक उमाशंकर मिश्राले असोज मसान्तसम्म बैंकमा कुनै बाँकी वक्यौता नभए पनि पछि बैंकले १० लाख तिर्न आग्रह गरेको र आफूले तिरेको बताए । उनले पटकपटक ऋण तिर्न भन्दै फोन गर्ने र टर्चर दिँदै आएको गुनासो गरे । बैंकको आग्रहअनुसार १० लाख तिरेको तर पछि फेरी ९ लाख तिर्न भनेको उनले बताए । ९ लाख रुपैयाँ तिर्न पनि तयार भइ रकम जुटाउनतर्फ लागेको तर, केही दिनपछि बैंकले फेरि ३० लाख जम्मा गर्न भनेको उनले गनासो गरे ।

उनले तिर्न नभएको पैसा पनि पटकपटक तिर्न भन्दै टर्चर गरे पनि सेवाग्राही र स्थानीय आन्दोलित भई बैकमा तालाबन्दी गरेको जनाए । तालाबन्दीपछि बैंक प्रशासनले समस्या समाधानका लागि छलफल गर्न तयार रहेको भन्दै सोमबारका लागि समय दिएपछि एक घण्टासम्म लगाइएको ताला खोलिएको थियो । घटनाबारे बुझ्दा एनआईसी एशिया बैंक लुम्बिनी शाखा प्रबन्धक प्रविन रायमाझीले सोमबारको छलफल गर्ने भनी सहमति भएको बताए । बैंक कानूनी प्रक्रियाअनुसार नै अघि बढेको बताउँदै उनले सोमबारको छलफल हुने बताए ।