September 30, 2022, Friday
१४ आश्विन २०७९, शुक्रबार

तानसेन नगरवासीलाई विद्युत् महसुल छुट

पाल्पा– तानसेन नगरवसीले विद्युत् महसुलमा छुट पाउने भएका छन् । नगरपालिकाले पाँच एम्पियरको मिटर जडान गरी २० युनिटसम्म विद्युत् खपत गर्ने घरधुरीलाई महसुल छुट दिने भएको हो ।

Advertisement

तानसेन नगरपालिकाले नेपाल विद्युत् प्राधिकरण पाल्पा वितरण केन्द्रसँग सम्झौता गर्दै महिनामा २० युनिटसम्मको विद्युत् खपत गर्ने एक हजार आठ सय १५ घरधुरीको विद्युत् महसुल छुट गर्ने निर्णय गरेको उपप्रमुख प्रतीक्षा सिञ्जालीले जानकारी दिइन् । 

विद्युत् महसुल छुट कार्यविधि २०७९ अनुसार आर्थिक रुपले कमजोर रहेका घरधुरीहरुको पारिवारिक लगत सङ्कलन गरी महसुल छुट दिने व्यवस्था मिलाइएको हो । यसअन्तर्गत प्रतिपरिवार एक वर्षको रु तीन सय ६० को दरले विद्युत् महसुल विद्युत् प्राधिकरणलाई अग्रिम भुक्तानी गर्ने सम्झौता गरिएको पाल्पा वितरण केन्द्रका प्रमुख इन्जिनियर विवेक अधिकारीले बताए । 

यहाँका विपन्न परिवारलाई लक्षित गरी ११औँ नगरसभाबाट महसुल छुट गर्ने निर्णय गरिएको थियो । तानसेन नगरपालिकाले लिफ्ट खानेपानी आयोजनामा विद्युत् महसुलको २५ प्रतिशत छुटको समेत व्यवस्था गरेको छ । पाल्पामा २० युनिटभन्दा थोरै विद्युत् खपत गर्ने परिवारहरु २५ हजार रहेका छन् ।