कार्यविधि नहुँदा खुला कारागार प्रयोगबिहीन

बाँके– बाँकेको खुला कारागारको संरचना प्रयोगविहीन भएको छ । खुला कारागारसम्बन्धी कार्यविधि नहुँदा कारागार प्रयोगबिहीन भएको हो ।

खुला कारागार सञ्चालन कार्यविधि नबनेका कारण निर्माण भएका संरचना अझै प्रयोगमा आउन नसकेको बाँके जिल्ला कारागार प्रमुख रामकुमार सोनकरले बताए । नेपालगञ्ज उपमहानगरसँग जोडिएको जानकी गाउँपालिका–६ स्थित गनापुरमा एक दशकअघि कारागार भवन निर्माण गरिएको थियो ।

Advertisement

तत्कालीन कृषि ज्ञान केन्द्रको दुई बिघा जमिनमा पौने दुई करोडका लगानीमा कारागारको संरचना निर्माण भएको हो । ‘दुईतिहाइ कैद भुक्तान गरिसकेका र आचारण सुधार भएका कैदीबन्दीलाई निश्चित सर्तका आधारमा खुला कारागारमा बस्ने अवधारणाअनुसार बाँकेमा खुला कारागार बनाइएको हो। खुला कारागार सञ्चालनका लागि विभागबाट आवश्यक कार्यविधि र निर्देशन नआउँदा अन्योलमा छौँ’, उनले भने।

खुला कारागारका संरचना प्रयोगविहीन भइरहँदा बाँके जिल्ला कारागारमा भने क्षमताभन्दा दोब्बर कैदीबन्दी बस्न बाध्य छन्। तीन सय ५० जना क्षमताको कारागारमा सात सय ५० कैदीबन्दी कोचाकोच गरेर बस्न बाध्य छन्।

‘सबै पूर्वाधार प्रयोगविहीन छन्,’ कारागारका चौकीदार जगराम चौहानले भने, ‘११ वर्षदेखि मैले नै कुरेर बसेको छु, भवन प्रयोगमा छैनन्, भएका भवनको संरक्षण नहुँदा जीर्ण बनिरहेको छ, कसैलाई वास्ता छैन।’

बाँकेका प्रमुख जिल्ला अधिकारी सूर्यबहादुर खत्रीले खुला कारागार सञ्चालनका लगि सम्बन्धित निकायसँग समन्वय गरिरहेका जानकारी दिए। ‘राम्रो आचरण भएका कैदीबन्दीले दिनभर खेतीपातीको काम गर्ने र बेलुकी कारागारमा आएर हाजिरी गरी त्यहीँ बस्ने अवधारणाका साथ उक्त कारागार बनाइएको हो’, कारागार प्रमुख सोनकरले भने।

अधिकारकार्मी वसन्त गौतमले भने, ‘खुला कारागार भवन सञ्चालनमा सम्बन्धित निकायको ध्यान जानु आवश्यक छ।’ कारागार संचालनमा नआएको भन्दै चौतफई आलोचना भइरहेको छ । तर, कार्यविधि अझै बनेको छैन ।