गौतमबुद्ध विमानस्थलमा छुट सुविधा थपिएको थपियै

भैरहवा– नेपाल नागरिक उड्डयन प्राधिकरणले दुई अघि (बिहीबार) गौतमबुद्ध अन्तर्राष्ट्रिय विमानस्थलमा ‘ग्राउन्ड ह्यान्डलिङ’ शुल्कमा ५० प्रतिशत छुट दिने निर्णय गरेको छ । ‘नयाँ विमानस्थल भएकाले गौतमबुद्धमा विदेशी बायुसेवालाई आकर्षित गर्न प्राधिकरणले यस्तो निर्णय गरेको हो’, प्राधिकरणका सहायक प्रवक्ता ज्ञानेन्द्र भुलले जारी गरेको विज्ञप्तीमा भनिएको छ ।

प्राधिकरणको निर्णयसँगै भैहरवामा विदेशी वायुसेवाको भूमीस्थ व्यवस्थापन (ग्राउन्ड ह्ह्यान्डलिङ) गर्दै आएको नेपाल वायुसेवा निगमले बिहीबारदेखि नै विदेशी वायुसेवालाई ५० प्रतिशत छुट दिन थालेको जनाएको छ । यसले विदेशी वायुसेवालाई थप आकर्षित गर्ने विश्वास सरकारी पक्षको छ ।

Advertisement

यतिमात्रै होइन्, गौतमबुद्धमा धेरैभन्दा धेरै वायुसेवालाई आकर्षित गर्न प्राधिकरणले थुप्रै छुट दिएको छ । यो छुटको अहिलेसम्म कुवेतको जजिरा एयरवेजले मात्रै फाइदा उठाउँदै आएको छ । यहाँबाट अन्य विदेशी वायुसेवाले सेवा सुरु नगरेकाले जजिराले मात्रै गौतमबुद्धबाट सुविधा उपभोग गरिरहेको हो ।

गत जेठ दुई गतेबाट गौतमबुद्धमा व्यवसायिक उडान सुरु भएको हो हो । त्यसयता जजिराले हप्तामा सोमबार, बुधबार र शनिबार गरी तीन दिन उडान गर्दै आएको छ । वायुसेवा कम्पनीहरुलाई आकर्षित गर्न सरकारले यसअघि नै गौतमबुद्ध विमानस्थलमा एक वर्षका लागि अवतरण, सञ्चार, सुरक्षालगायतमा शुल्कमा विमान कम्पनीलाई पूर्ण छुट दिएको छ । यो सुविधा उपभोग गर्दै जजिराले अहिले प्रत्येक उडानमा करिब एक लाख रुपैयाँ छुट पाइरहेको छ ।

‘छुट सुविधा र यात्रु पर्याप्त पाएपछि जजिरा उत्साहित छ’, गौतमबुद्ध विमानस्थलका महाप्रबन्धक गोविन्दप्रसाद दाहालले भने । जजिराले विमानस्थलबाट छुट पाएपछि कुवेत उडान–अवतरणमा यात्रुलाई पनि काठमाडौं भन्दा भैरहवाबाट आठ हजार रुपैयाँ सस्तो भाडादर लिने गरेको छ ।

छुट सुविधा र पर्याप्त हवाई यात्रु पाउने भएपछि विज एयरले पनि उडान भर्ने तयारी गरिरहेको छ । उक्त एयरले आउँदो सेप्टेम्बर अन्तिमबाट उडान भर्ने तयारी गरेको हो । हङ्गेरीबाट विश्वका विभिन्न देशमा उडान गरिरहेको ‘अल्ट्रा लो कस्ट एस वायुसेवा’को विज एयरले भैरहवाबाट यूएईको अबुधाबी उडान भर्ने तयारी गरिरहेको दाहालले जनाए । प्राधिकरणका अनुसार अबुधाबीबाट सातामा तीन उडान गर्न वीज एयरलाई प्रारम्भिक अनुमति दिइसकेको छ । भैरहवाबाट विज एयरले एयरबस ३२१ निओ सिरीजको जहाजमाफर्त् उडान सञ्चालन गर्ने प्रस्ताव गरेको थियो । विजले १९० सिट क्षमताको उक्त जहाज नेपालमै पहिलोपटक उडान गर्न लागेको हो । विजले खासगरी पर्यटन क्षेत्र र वैदेशिक रोजगारीमा जाने यात्रुलाई लक्षित गरेको छ ।

सन् १९५८ जुलाई ८ बाट आन्तरिक विमास्थलका रुपमा सेवा दिँदै आएको गौतमबुद्ध विमानस्थललाई स्तरोन्नती गरी अन्तर्राष्ट्रियस्तर बनाइएको हो । अन्तर्राष्ट्रि विमानस्थ लबनेपछि यसलाई पूर्ण क्षमतामा चलाउन सरकारले विभिन्न उपाय अपनाइरहेको छ । यसैको शिलशिलामा यहाँ धेरै छुट सुविधा दिइएको हो । ‘सरकारले केही वर्ष घाटामै गए पनि विदेशी विमान कम्पनीलाई आकर्षित गरेर विमानस्थल पूर्ण क्षमतामा संचालन गर्नुपर्छ’, पर्यटन व्यवसायी किशोर जोशीले भने । उनले तत्काल भन्दा दीर्घकालीन फाइदा हेर्नुपर्ने बताए । जोशीले नेपाल एयरलाइन्समार्फत् तत्काल भैरहवाबाट दिल्ली उडान गर्न पनि माग गरे ।

यो विमानस्थल संचालन आएसँगै त्रिभुवन अन्तर्राष्ट्रिय विमानस्थलको विकल्प बनेको पनि छ । कुनै कारण भित्रुवन विमानस्थलमा विमान उडान–अवतरण हुन नसक्ने अवस्था आएमा छिमेकी मुलुकमा पुर्याएर अवतरण गराउनु पर्ने बाध्यता अन्त्य पनि भएको छ । गौतमबुद्धमा वायुयानको उडान सुरक्षाका लागि आवश्यक पर्ने आधुनिक उड्डयन सहाय उपकरण आइएलएस समेत जडान गरिएको दाहालले जानकारी दिए ।

जानाकारहरुले हरेक हिसावले गौतमबुद्ध काठमाडौंभन्दा सुरक्षित भएको बताउँदै आएका छन् । ३ हजार मिटर लामो धावनमार्ग रहेको विमानस्थलमा बोइङ ७७७ एयर बस ३३० र सोही क्षमताका वाइडबडी विमानहरु उडान अवतरण सहजै सकिने बताइएको छ । यो विमानस्थल लुम्बिनीको प्रवेशद्वारमा भएकाले विश्वलाई यस क्षेत्रसँग जोड्ने सम्पर्क माध्यम समेत बन्न पुगेको छ । ‘अब लुम्बिनीलाई केन्द्रमा राखेर बौद्धिष्ट मुलुकबाट उडान गर्ने वातावरण सिर्जना गर्नुपर्छ’, सिद्धार्थ होटल एशोसिएसनका अध्यक्ष चन्द्रप्रकाश श्रेष्ठ भन्छन्, ‘यसले कोरोना थलिएको पर्यटन बजार उकास्न र विदेशी मुद्रा आर्जन गर्न सहयोग पुग्ने छ ।’