September 30, 2022, Friday
१४ आश्विन २०७९, शुक्रबार

तीन टिपर र गाडीसहित अवैध चिनी बरामद

परासी– अवैध तरिकाबाट नदीजन्य पदार्थ उत्खनन् गरेर बोकीरहेका ३ वटा टिपरलाई ईलाका प्रहरी कार्यालय, सुनवल पश्चिम नवलपरासीले नियन्त्रणमा लिएको छ ।

Advertisement

साँझको समयमा सुनवल नगरपालिका–११ बर्दगोरिया क्षेत्रमा नदीजन्य पदार्थ अवैध रुपमा उत्खनन गरि ओसारी रहेको अवस्थामा प्रहरीले लु १ क ३८९०, लु २ ख ४२९० र लु १ क ५४०२ नम्बरको टिपरहरुलाई नियन्त्रणमा लिएर आवश्यक कारवाहीका लागि सुनवल नगरपालिकामा बुझाएको प्रहरी नायब उपरिक्षक भोजराज पाण्डेले बताए ।

नवलपरासी जिल्लाको खोलाहरुमा स्थानीय तस्करहरू नदीजन्य पदार्थको चोरी निकासी गरिरहेको खबर बाहिर आएपछि पालिका र प्रहरीहरु खोला क्षेत्रमा निगरानी बढाएका छन् । पालिकामा बुझाइएका ति टिपरहरुलाई निर्धारित जरिवाना गराइने पालिकाले जनाएको छ ।

त्यसैगरि प्रहरी चौकी बैरगनाथबाट खटिएको प्रहरी टोलीले रामग्राम १८ दशकट्टाबाट लु १ ज ४४०९ नम्बरको पिकअप गाडीसहित १५ क्विन्टल चिनी बरामद गरि जिल्ला प्रहरी कार्यालय मार्फत महेशपुर भन्सारलाई बुझाएको छ । बरामद चिनी ९० हजार र गाडीको मूल्य १२ लाख कायम गरि आवश्यक कारबाहीको लागि महेशपुर भन्सार बुझाइएको प्रहरी नायब उपरिक्षक पाण्डेले जानकारी दिए ।