बन्धक बनाएर चोरी

बर्दिया– बारबर्दिया नगरपालिका–९ भादा बजारमा बुधबार आएको एक समूहले दम्पत्तीलाई बन्धक बनाएर चोरी गरी फरार भएको छ । कतरनिया बजारस्थित सुनचाँदी पसलबाट नगद १ लाखसहित १८ तोला सुन लुटेको पीडित अर्जुन घिमिरेले बताए ।

मुखमा मास्क लगाएर आएको समूहले डेराबाट करिब ५ सय मिटरको दूरीमा रहेको पसलसम्म अर्जुन घिमिरेलाई बन्धक बनाएर लगी लुटपाट गरेको प्रारम्भिक अनुसन्धानबाट देखिएको प्रहरी प्रवक्ता डीएसपी सूर्य सुवेदीले बताए ।

६–७ जनाको समूहमा आएका लुटेराको समूहले घिमिरेको परिवारका अन्य सदस्यलाई घरमै थुनेका थिए । हातहतियारसहित आएका डकैत समूहले पसलमा रहेको सिसीक्यामेरा पनि लगेका छन् ।