May 29, 2022, Sunday
१५ जेष्ठ २०७९, आईतवार

गुणस्तरीय नीतिमा जोड

बुटवल– रुपन्देहीको बुटवल उद्योग वाणिज्य संघले गुणस्तरीय नीतिलाई जोड दिएको छ । व्यवसायिक हकहितको संरक्षण र सम्बद्र्धन गर्दै स्थानीय आर्थिक तथा सामाजिक विकासको माध्यमबाट राष्ट्रिय अर्थतन्त्रमा टेवा पुर्याउने उद्देश्य लिएको संघले उद्देश्य पूर्तिको लागि गुणस्तरीय नीतिलाई जोड दिइएको हो ।

Advertisement

संघले स्थापनाकालदेखि नै व्यवसायिक हकहित एवं सम्वद्र्धन तथा आर्थिक एर्व सामाजिक क्षेत्रको बिकासमा योगदान पुर्याउँदै आएको र तीनै कामहरुलाई गुणस्तरीय रुपमा निरन्तरता दिन तथा सेवामा आवश्यकता अनुसार परिमार्जन तथा व्यवस्थित गरी कार्यान्वयन गर्नको लागि अन्तर्राष्ट्रिय गुणस्तर व्यवस्थापन प्रणाली मार्फत कार्यक्रम (क्रियाकलाप)हरु सञ्चालन गर्ने प्रतिवद्धता व्यक्त गरेको हो ।

संघले सोमबार र मंगलबार लुम्बिनीमा रणनीतिक एवं चेम्बर व्यवस्थापन कार्यशाला गोष्ठिको आयोजना गरि आगामी २ वर्षको लागि लक्ष्य, रणनीति र कार्यक्रम निर्धारण गरेको हो । कार्यशाला गोष्ठिले आर्थिक रुपमा सवल, विश्वसनीय सेवा प्रदायक, सक्षम सचिवालय एवं दुरदर्शी सुशासनयुक्त प्रतिनीधिमुलक नेतृत्वदायी संघको रुपमा बिकास गर्ने लक्ष्य तय गरिएको संघका महासचिव बिमलराज भट्टराईले जानकारी दिए ।

संघका अध्यक्ष उज्ज्वलप्रसाद कसजूको अध्यक्षतामा भएको कार्यशाला गोष्ठिले स्थानीय आर्थिक एवं व्यसायिक क्षेत्रको विकासको लागि प्रत्येक वर्ष कम्तिमा एउटा औद्योगिक व्यापार मेला वा कुनै विशिष्टिकृत मेला सञ्चालन गर्ने, संघका सदस्यहरुको आवश्यकता बमोजिम सेवामा सुधार गर्दै सदस्यहरुको सन्तुष्टि बृद्धि गर्दै जाने र वार्षिक ५ प्रतिशतका दरले सदस्य संख्या बृद्धि गर्दै जाने लक्ष्य तय गरिएको छ ।

संघका कार्यरत कर्मचारीहरुको क्षमता तथा कार्यदक्षता अभिबृद्धिको लागि तालिम सञ्चालन गर्ने, उद्योगी र व्यवसायीहरुको क्षमता अभिवृद्धिको लागि निरन्तर क्रियाशील रहँदै वार्षिक रुपमा तालिम, गोष्ठीको आयोजना गर्ने र कार्यसमितिको व्यवसायिक क्षमता र दक्षता विकासका लागि वार्षिक रुपमा न्यूनतम एउटा अध्ययन अवलोकन भ्रमणको आयोजना गर्ने गरि गुणस्तरीय नीति अख्तियार गरेको हो ।

त्यस्तैगरी उद्योगी, व्यापारी वर्गमा एकता, मैत्रीपूर्ण, सद्भावनाको वातावरण सीर्जना गर्ने–गराउने तथा उद्योग वाणिज्य क्षेत्रको हित संरक्षण र सवद्र्धन गर्ने–गराउने उद्देश्यले लिईएको महासचिव भट्टराईले बताए ।

रणनीतिक एवं चेम्बर व्यवस्थापन कार्यशाला गोष्ठिको उद्घाटन कार्यक्रममा नेपाल उद्योग बाणिज्य महासंघका वरिष्ठ उपाध्यक्ष चन्द्रप्रसाद ढकालले लुम्बिनीमा लगानीको सम्भावना प्रसस्त रहेको बताउँदै सामुहिक लागानीको वातावरण बनाउन आग्रह गरे । उनले बुटवल उद्योग वाणिज्य संघलाई आवश्यक सहयोगको लागि आफू सधै सकारात्मक र प्रतिवद्ध रहेको बताए । त्यस्तै नेपाल उद्योग वाणिज्य महासंघ लुम्बिनी प्रदेशका अध्यक्ष कृष्णप्रसाद शर्माले सिंगो लुम्बिनी प्रदेशमा लगानीका सम्भावनाहरु प्रसस्त भएपनि वातावरण बन्न नसकेको बताए ।

कार्यक्रममा स्वागत गर्दै संघका अध्यक्ष उज्ज्वलप्रसाद कसजूले संघको स्थापनाकालदेखि हालसम्म संघले आर्थिक तथा सामाजिक बिकासमा गरेको योगदानको चर्चा गरे । उनले यस क्षेत्रमा लगानीका सम्भावनाहरु भएपनि त्यसअनुसारको वातावरण अझै तयार नभईसकेको त्यसका लागि आफूहरुका पहल र पैरवी जारी रहेको जानकारी गराए । लुम्बिनी नामैले पनि पर्यटन उद्योगको लागि राम्रो सम्भावना रहेको र पर्यटकीय गन्तव्यको बिकास, प्रचार–प्रसार तथा प्रवद्र्धन गर्न सकेमात्रै त्यससंग जोडिएको प्रर्यटन उद्योग फस्टाउन सक्ने बताउँदै उनले त्यसमा सबैको साथ र सहयोग हुनुपर्ने भनाई राखे ।